BAUCAU, STLTIMORLESTE.com – Konfederasaun Desportiva Timor-Leste (CDTL) Munisípiu Baucau prepara ona modalidade desportu 16, ho kompetetór liu na’in 100, atu reprezenta Baucau iha Festival Nasionál Desportu (FND) no Festival Desportu Paralimpiku (FDP) 2026, ne’ebé sei hala’o iha Dili, loron 5 Novembru.
Prezidente CDTL Munisípiu Baucau, João Buka Tuir, hateten katak preparasaun ba partisipasaun atleta Baucau nian lao hela, inklui liuhusi enkontru ho Prezidente Asosiasaun Desportiva sira hodi prepara atleta sira ba kompetisaun nasionál.
Nia hateten, CDTL Baucau halo ona reuniaun ho Asosiasaun Desportiva sira to’o dala haat, hodi fó orientasaun kona-ba preparasaun no prosesu hili atleta sira ne’ebé sei reprezenta Munisípiu Baucau.
“Ita iha preparasaun masimu ho Prezidente Asosiasaun modalidade 16. Ita fó ona orientasaun, reuniaun dala haat ona, atu Asosiasaun ida-idak prepara ita nia atleta sira sai reprezenta Munisípiu Baucau,” hateten João Buka Tuir ba jornalista sira iha Vila Antiga Baucau, Kuarta (30/09/2026).
Nia esplika, formulariu rejistrasaun husi Ministériu Juventude, Desportu, Arte no Kultura (MJDAK) ne’ebé haruka ba CDTL Munisipál sira inklui Baucau, uza númeru 2026/FND-FDP/BS-BN/F-01.
Modalidade sira ne’ebé prepara mak futebol, futsal, voleibol, basketbol, atletizmu, boxe amadora, taekwondo, karatedo, xadres, badminton, ténis mesa, desportu tradisionál hana kalik, archery, no modalidade seluk, inklui powerlifting.
Ba modalidade sira ne’ebé involve atleta feto no mane, CDTL Baucau prepara reprezentante tuir nesesidade kada modalidade, enkuantu powerlifting sei envolve atleta mane.
João Buka Tuir hateten, tuir planu inisiál, atleta sira tenke hili liuhusi prosesu desportivu iha nivel Postu Administrativu sira. Maibé, tanba tempu preparasaun limitadu, CDTL fó fiar ba Asosiasaun Desportiva sira atu hili atleta ne’ebé besik no prontu liu ba kompetisaun.
“Ita nia preparasaun masimu ona. Ita fiar ba ita nia Asosiasaun sira. Ita fiar katak sei lori rezultadu diak mai Baucau. Premiu FND ne’e ita sei lori,” Buka Tuir mehi dook
Orsamentu US$15,000 la sufisiente
Iha parte seluk, João Buka Tuir hateten katak CDTL Munisípiu Baucau hetan apoiu orsamentál US$15,000 husi Governu ba preparasaun, maibé konsidera montante refere seidauk sufisiente atu suporta preparasaun modalidade 16, inklui nesesidade atleta sira durante eventu iha Dili.
Nia kompara ho periodu sira liubá, ne’ebé apoiu ba modalidade 4 de’it ho orsamentu to’o US$12,000.
Ho modalidade ne’ebé aumenta to’o 16, CDTL Baucau konsidera katak nesesidade orsamentu mós aumenta, liuliu ba treinamentu, transporte, ekipamentu, alimentasaun no estadia atleta sira.
“Tuir ami nia baze ne’ebé ami halo husi komisaun preparativu, ami presiza hetan rihun US$20. Prezidente Autoridade hamutuk ho komisaun preparativu mak buka osan oinsá atu to’o rihun US$20 ne’e,” hateten João Buka Tuir
Nia hateten, limitasaun orsamentu refere CDTL Baucau hato’o ona ba Prezidente Autoridade Munisípal Baucau, atu buka mekanizmu no apoiu adisionál ba preparasaun delegasaun Baucau.
Aleinde apoiu husi Governu, CDTL Baucau mós halo koordenasaun ho setór privadu iha Munisípiu Baucau atu buka apoiu ba nesesidade preparasaun no estadia atleta sira durante partisipasaun iha FND no FDP 2026.
To’o notísia ne’e publika, STL seidauk hetan komentáriu husi Prezidente Autoridade Munisípal Baucau, Veneranda Lemos, tanba iha hela servisu Estadu iha rai-li’ur.
CDTL Baucau liuhusi Asosiasaun Desportiva sira prepara kompetetór liu na’in 100 atu partisipa iha modalidade desportu 16 iha FND no FDP 2026 iha Dili.
(tom)
