DÍLI, STLTIMORLESTE.com — Tribunal Judisial Primeira Instánsia Dili (TJPID) kondena arguidu ho inisiál A ba tinan 8 prizaun, tanba abuzu seksual ba menor.
Desizaun ne’e liu hosi leitura akórdaun iha Tribunal Dili, Kuarta-feira (30/09/2026), tuir fonte judisiál iha tribunal.
Ministériu Públiku akuza arguidu ho krime abuzu seksual ba menor, ne’ebé previstu iha Artigu 177 Kódigu Penál Timor-Leste.
Artigu 177 prevee pena prizaun tinan 5 to’o 20 ba ema ne’ebé pratika koitu vajinál, anal ka oral ho labarik menus hosi tinan 14.
Enkuantu, ema ne’ebé pratika aktu seksual relevante ho labarik menus hosi tinan 14, bele hetan pena prizaun tinan 5 to’o 15.
Iha sala julgamentu, Juiz José Quintão deklara katak, Tribunal rona ona deklarasaun hosi arguidu no vítima iha julgamentu anteriór.
Tribunal konsidera katak, maski arguidu la fó esplikaasaun klaru kona-ba faktus, relatóriu médiku suporta konkluzaun kona-ba prátika krime seksual ba menor.
Juiz prosesu esplika katak, Tribunal konsidera sirkunstánsia relevante sira atu determina pena ba arguidu, inklui faktu katak nia primeira vez mai tribunal.
“Tribunal konsidera sirkunstánsia sira no objetivu prevensaun jerál, tanba kazu krime hanesan ne’e kontinua aumenta,” deklara Juiz José Quintão.
Bazeia ba konsiderasaun sira ne’e, Tribunal Kolejiál deside kondena arguidu ho pena prizaun tinan 8 tanba krime abuzu seksual ba menor.
Tribunal mos informa katak, arguidu atualmente iha prizaun preventiva no sei kontinua iha prizaun to’o desizaun sai transitadu iha julgadu.
Juiz informa ba arguidu katak, se la konkorda ho desizaun Tribunal Primeira Instánsia Dili, nia bele halo rekursu liu hosi defeza ba Tribunal Rekursu.
Juiz mos fó hanoin ba arguidu atu durante permanénsia iha prizaun aprende buat di’ak, abandona hahalok la di’ak no respeita lei.
Desizaun sei notifika ba Prokuradór no defeza. Parte ne’ebé la aseita ho desizaun bele halo rekursu tuir mekanizmu legal ne’ebé vigora.
Tuir observasaun STL iha Tribunal Dili, Guarda Prizional akompaña arguidu ba sala julgamentu no lori fila kedas ba prizaun hafoin desizaun.
(ter)
