DILI, STLTIMORLESTE.com – Prezidente Repúblika (PR), José Ramos-Horta loke ofisialmente Dili International Film Festival (DIFF) 2026, iha Timor Plaza, Kuarta (30/09).
Prezidente Repúblika José Ramos-Horta elojia kontribuisaun organizadór DIFF ba dezenvolvimentu arte no kultura iha Timor-Leste.
PR Horta subliña katak, sinema importante atu konta istória, fahe kultura no eduka sosiedade, liuliu ba jerasaun foun.
Xefe Estadu mós fahe ninia paixaun ba sétima arte, inklui filme Italianu, Fransa no filme internasionál sira.
“Ha’u gosta sinema. Ha’u sente ha’u nia favoritu maka Cinema Paradiso. Ha’u haree ona nia filme sira hotu.”
PR Horta mós refere ba filme Cinema Paradiso, filme Italianu sira hosi dékada 1960, no Forrest Gump nu’udar obra sinema konhesida internasionál.
Nia fahe memória kona-ba dezenvolvimentu sinema iha Dili, inklui tempu bainhira komunidade lokal komesa familiariza ho ekran sinema.
DIFF sai espasu ba realizadór filmista lokal no internasionál, artista, estudante no amante sinema atu fahe istória no esperiénsia.
Festival ne’e mós fó oportunidade ba realizadór Timoroan atu dezenvolve kapasidade liuhusi formasaun, diskusaun, workshop no sesaun mentoria.
Edisaún 2026 mak edisaun ualu, ho objetivu selebra kriatividade Timor-Leste nian no lori filme husi nasaun oioin ba públiku Dili.
Iha eventu ne’e, PR Horta mós ko’alia kona-ba Timor-Leste nia imajen internasionál, inklui seguransa, estabilidade no liberdade imprensa.
“Ha’u kontente tebes ho imi barak ne’ebé mai hosi rejiaun tomak iha mundu tomak hodi hasoru.”
Prezidente dehan, Timor-Leste tenke kontinua oferese ambiente seguru no pasífiku ba vizitante, artista, investidór no komunidade internasionál.
PR Horta hateten, Prezidénsia Repúblika hakarak hametin relasaun ho povu, artista no komunidade internasionál liuhusi ambiente nakloke.
Nia konsidera eventu kulturál hanesan DIFF importante atu promove Timor-Leste nia istória, kultura no talentu lokal ba públiku internasionál.
Ba futuru, PR Horta mós refere ba eventu internasionál sira, inklui Dili International Marathon, ne’ebé bele atrai partisipante no visitante.
Nia hakarak eventu internasionál sira ajuda promove turizmu, atividade ekonomia no Timor-Leste nia prezensa iha nivel rejionál no internasionál.
Abertura DIFF 2026 marka komesu festival ne’ebé reúnem filme, realizadór no públiku husi Timor-Leste no nasaun seluk.
Festival ne’e sei hala’o programa iha venue oioin iha Dili, inklui Platinum Cineplex, Beachside Cinema no espasu kulturál sira seluk.
(eme)
