DILI, STLTIMORLESTE.com – Banku Kaebauk, S.A., sei lansa ofisialmente nu’udar banku komersiál privadu iha Timor-Leste, iha 23 Outubru 2026.
CEO Banku Kaebauk, Anjelho Soares hatete, lansamentu ne’e sei marka kapitulu foun ba setór bankáriu no finanseiru Timor-Leste.
Anjelho Soares hatete deklarasaun ne’e hafoin nia hamutuk ho ekipa halo enkontru ho Prezidente Repúblika José Ramos-Horta, iha Dili, Kuarta-feira (30/09/2026).
Enkontru ne’e mós uza atu konvida Prezidente Repúblika partisipa diretamente iha lansamentu ofisiál Banco Kaebauk, S.A., iha 23 Outubru.
“Lansamentu ofisiál sei marka kapitulu foun ida iha setór bankáriu no finanseiru Timor-Leste nian,” dehan Anjelho Soares.
CEO Kaebauk dehan, banku foun ne’e iha kompromisu atu hametin inkluzaun finanseira no kontribui ba dezenvolvimentu sustentável ekonomia nasaun nian.
Depois lansamentu, Banku Kaebauk, S.A., sei hahú loke nia odamatan ba públiku no kliente sira, iha 26 Outubru 2026.
Banku ne’e sei oferese servisu bankáriu ne’ebé asesível, konfiável no orientadu ba nesesidade kliente, sidadaun no negósiu sira.
Nu’udar banku privadu foun, Banco Kaebauk sei kontinua fó atensaun ba mikrokréditu, ne’ebé sai parte importante husi nia atividade no misaun.
Anjelho Soares hatete banku sei kontinua hadi’a servisu mikrokréditu, atu kria oportunidade liután ba kliente no komunidade sira.
“Ami iha kompromisu forte atu hametin no hadi’a servisu hirak-ne’e ba kliente no komunidade sira,” katak nia.
Banku Kaebauk konsidera prezensa banku foun ne’e nu’udar oportunidade atu aumenta asesu komunidade ba servisu finanseiru iha Timor-Leste.
Inkluzaun finanseira sai asuntu importante tanba komunidade sira presiza asesu ba servisu finanseiru ne’ebé asesível no apropriadu.
Liuhusi servisu bankáriu, komunidade no negósiu sira bele hetan asesu ba fasilidade finanseira atu apoia atividade ekonomia.
Banku Kaebauk mós hatudu kompromisu atu sai parseiru finanseiru ne’ebé konfiável ba povu no negósiu sira iha Timor-Leste.
Iha enkontru ho Prezidente Repúblika, ekipa Banku Kaebauk hato’o vizaun no kompromisu nu’udar banku komersiál privadu foun.
Banku Kaebauk mós agradese Prezidente José Ramos-Horta tanba simu ekipa banku nian no simu konvite atu partisipa iha lansamentu.
Prezidente Repúblika José Ramos-Horta mós simu konvite Banku Kaebauk no tau ona eventu lansamentu ne’e iha nia ajenda.
Lansamentu ofisiál iha 23 Outubru sei marka inísiu foun ba Banku Kaebauk nu’udar instituisaun bankáriu komersiál iha Timor-Leste.
Depois lansamentu, Banku Kaebauk sei loke servisu ba públiku iha 26 Outubru, hodi hahú fornese servisu bankáriu ba komunidade.
(eme)
