DILI, STLTIMORLESTE.com – Eis Deputadu PD, Virgilio Hornai hakarak Orsamentu Jeral Estadu (OJE) 2027 biliaun US$ 2 resin tenke justu ba povu hotu, la’ós konsentra de’it ba saláriu no vensimentu, maibé tenke to’o ba infraestrutura bázika iha foho.
Tuir nia, OJE 2027 ho kategoria despeza akumulada besik biliaun USS 2.568 presiza haree ho seriedade atu garante dezenvolvimentu sustentavel no asesibilidade bázika ba povu.
Nia esplika, área despeza naturál ne’ebé tradisionálmente fahe tuir rubrika mak hanesan Saláriu no Vensimentu, Bens no Servisus, Kapitál Menór, Transferénsia Públika no Kapitál Dezenvolvimentu.
Husi entre rubrika despeza orsamentál ne’ebé foku, hanesan alvu prioridade mak fundu infraestrutura báziku hodi garantia modalidade asesibilidade.
“Modalidade asesibilidade ne’e ha’u koloka hanesan prioridade fundamentál, tanba OJE ne’e tenke justu. La’ós justu ba funsionáriu de’it, maibé justu ba povu tomak iha foho no iha sidade,” dehan Virgilio Hornai ba STL, iha Dili, Kinta (01/10/2026).
Virgilio Hornai hatutan katak, se Governu investe maka’as iha infraestrutura bázika, sei fasilita asesu merkadu, edukasaun no saúde ba komunidade sira iha foho.
“OJE biliaun US$ 2.568 ne’e tenke tradús ba benefísiu reál. Rubrika lima ne’e tenke ekilibra, maibé Kapitál Dezenvolvimentu liu-liu fundu infraestrutura mak xave atu garante OJE ne’e duni justu ba povu,” nia subliña.
Eis Membru Konsellu Estadu nee husu mós ba Parlamentu Nasionál atu halo diskusaun kle’an bainhira debate OJE 2027, hodi evita despeza la nesesáriu no asegura osan estadu uza duni ba interese nasionál.
Iha parte ketak Observadór Ekonomia, Adelino Freitas konsidera ideia OJE justu ne’e relevante tebes, tanba tinan barak OJE la ekilibra.
Nia dehan, bainhira Kapitál Dezenvolvimentu ki’ik liu kompara ho Saláriu no Vensimentu, dezenvolvimentu la la’o.
Entretantu, Akademista UNTL, Silveiro Magno, hatete prinsipiu OJE justu ne’ebé Virgilio Hornai ko’alia presiza sai duni kritériu iha debate PN, tanba OJE tenke responde ba nesesidade povu nian la’ós de’it sustenta mákina estadu.
(car)
