DILI, STLTIMORLESTE.com – Prezidente Repúblika (PR), José Ramos-Horta prezide reuniaun Konsellu Superior Defeza no Seguransa (KSDS) hodi diskute seguransa nasionál, inklui krime siber, droga no tráfiku ema.
Primeiru-Ministru Kay Rala Xanana Gusmão hatete, reuniaun ne’e diskute situasaun seguransa rai laran no ameasa sira ne’ebé presiza koordenasaun instituisaun.
PM Xanana hato’o deklarasaun ne’e ba jornalista sira iha Palásiu Prezidensiál Nicolau Lobato, Bairo Pite, Kinta (01/10/2026), hafoin reuniaun KSDS remata.
“Agora ami koalia kona-ba seguransa nasionál no asuntu oioin, inklui krime siber, tráfiku droga no tráfiku ema,” dehan PM Xanana.
Nia hatete, membru KSDS konkorda atu hala’o tan reuniaun molok tinan remata, hodi atualiza Prezidente kona-ba evolusaun situasaun seguransa.
“Membru hotu sei hala’o reuniaun tan molok tinan remata, hodi fó informasaun ba Prezidente kona-ba situasaun,” dehan Xanana.
Iha reuniaun ne’e, PM Xanana mós hato’o apresiasaun ba instituisaun seguransa sira ne’ebé kontinua hala’o sira-nia knaar hodi mantein estabilidade.
Nia subliña katak, instituisaun seguransa presiza hadi’a koordenasaun no servisu atu responde ba ameasa no krime ne’ebé bele afeta sosiedade.
“Instituisaun seguransa sira hala’o servisu diak, maibé buat sira ne’e presiza hadi’a nafatin atu ita bele hetan seguransa diak,” katak nia.
Instituisaun ne’ebé envolve iha koordenasaun seguransa nasionál inklui PNTL, F-FDTL no servisu intelijénsia.
KSDS mak órgaun ne’ebé fó konsellu ba Prezidente Repúblika kona-ba asuntu defeza no seguransa nasionál.
Reuniaun KSDS permite lideransa estadu no instituisaun relevante troka informasaun kona-ba situasaun seguransa no dezafiu sira.
PM Xanana hatete, asuntu balu diskute iha reuniaun la bele divulga ba públiku tanba relasiona ho informasaun sensítivu no interese seguransa nasionál.
“PSIK, SNI, Polísia no F-FDTL hotu envolve. Ami koalia kona-ba asuntu barak, maibé la bele fó sai hotu tanba iha asuntu sensítivu,” hatete Xanana.
Nia hatete, Parlamentu Nasionál mós iha papél importante liuhusi diskusaun kona-ba asuntu seguransa no interese nasionál.
PM Xanana husu instituisaun hotu atu kontinua kooperasaun no hadi’a sira-nia servisu hodi garante seguransa iha Timor-Leste.
Reuniaun KSDS ne’e sai parte husi esforsu lideransa nasionál atu avalia situasaun seguransa no prepara medida nesesáriu hasoru dezafiu iha rai laran.
(eme)
