BAUCAU, STLTIMORLESTE.com – Diresaun Servisu Peskas Munisípiu Baucau enfrenta limitasaun fasilidade transporte atu hala’o monitorizasaun ba grupu peskas no hakiak ikan iha área remota, tanba ne’e funsionáriu sira tenke uza motorizada privadu hodi hala’o servisu.
Xefe Departamentu Peskas Munisípiu Baucau, António José Lopes, hateten katak antes ne’e diresaun refere iha inventáriu transporte hanesan motorizada no kareta ida, maibé motorizada sira kondisaun aat no halo ona lelaun enkuantu kareta ne’ebé iha parte Nasionál foti hikas ona, tanba kondisaun aat.
“Ami loro-loron la’o hela, maibé iha difikuldade, tanba fasilidade ba ami mak laiha. Iha Baucau nein fasilidade hanesan transporte ida atu ami uza tun ba baze, maibé ami kontinua la’o,” António hateten ba STL iha nia kna’ar fatin Vila Nova Baucau, Kinta (01/10/2026).
Tuir nia, funsionáriu sira atual depende liu ba motorizada privadu hodi halo monitorizasaun ba grupu peskas sira ne’ebé hetan apoiu husi Governu iha Munisípiu Baucau.
António hateten, área servisu Diresaun Servisu Peskas Baucau nian luan, tanba grupu peskas sira estende husi área Binagua, Laga, to’o Vemasse. Funsionáriu sira tenke akompaña no monitoriza grupu sira atu garante grupu sira bele aumenta rendimentu no kuidadu di’ak sira nia ekipamentu no atividade peskas.
Aleinde grupu peskas, Diresaun Servisu Peskas mós hala’o monitorizasaun ba grupu hakiak ikan hamutuk neen iha Munisípiu Baucau, inklui sentru vivierus. Parte husi grupu sira ne’e balu lokaliza iha área remota, ne’ebé kondisaun estrada mós difikulta asesu ba ekipa tékniku.
António hateten katak, Ministériu fó apoiu kombustível US$25 kada fulan ba atividade servisu, maibé montante refere la sufisiente atu kobre nesesidade transporte tanba distánsia servisu naruk no kondisaun estrada ne’ebé aat.
“Osan ne’e la to’o tuir dalan, mak roda kuak no motor aat, ami hasai ami nia osan. Maibé ita servisu ba nasaun, hakarak ka lakohi, ejijénsia husi ne’ebá mai ita tenke tun,” nia dehan.
Nia hateten katak, bainhira motorizada privadu sira hasoru problema mekaniku ka estrada aat, funsionáriu sira tenke suporta ho osan privadu ba kustu reparasaun , maski transporte refere uza ba atividade servisu públiku.
Preokupasaun kona-ba limitasaun transporte no fasilidade operasional ne’e, tuir António, liuhusi Servisu Munisípal Diresaun Servisu Peskas aprezenta ona ba Ministériu iha nivel nasional.
Maibé to’o agora, preokupasaun refere seidauk hetan resposta konkreta kona-ba fornesimentu transporte ka fasilidade adisional atu apoia atividade monitorizasaun iha Munisípiu Baucau.
Maski nune’e, António kontinua iha esperansa katak preokupasaun ne’ebé aprezenta ona ba nivel nasional sei hetan atensaun, tanba transporte sai nesesidade importante ba funsionáriu sira atu bele hala’o monitorizasaun ba grupu peskas no hakiak ikan, liuliu iha área remota.
Totál funsionáriu ne’ebé hala’o servisu iha Diresaun Servisu Peskas Munisípiu Baucau hamutuk na’in 10, ne’ebé kontinua hala’o atividade monitorizasaun ho fasilidade ne’ebé limitadu.
(tom)
