DÍLI, STLTIMORLESTE.com — Ministeriu Edukasaun (ME) sei rekruta profesores 5.000 resin iha 2026 atu responde ba nesesidade manorin iha nivel edukasaun oioin.
Diretor Nasional Rekursu Umanu ME, João Amaral hato’o informasaun ne’e ba STL iha nia servisu fatin, Kinta (01/10/2026).
“Ami sei halo rekrutamentu provizoriamente ba profesores 5.000 resin. Sira sei koloka ba pré-eskolár, ensinu baziku, sekundáriu jerál no tékniku-vokasional,” dehan João.
João hatete, rekrutamentu sei hala’o liuhosi konkursu públiku, ho kandidatu sira konsidera tuir abilidade no agrupamentu área ne’ebé presiza.
Nia esplika, rekrutamentu ne’e sei hala’o iha 2026, ho objetivu responde ba nesesidade profesores iha nivel ensinu oioin.
“Kuadru pesoál mak sai baze atu aumenta númeru profesores ba futuru no koloka sira tuir nivel ensinu ne’ebé presiza,” nia hateten.
João hatete, kualidade profesores mós konsidera, liuliu formasaun no kualidade ne’ebé sira hetan iha universidade sira.
Enkuantu, Diretor Ezekutivu TLCE, José Monteiro hatete, bazeia ba observasaun organizasaun ne’e, eskola balun sei enfrenta falta professores.
Nia konsidera rekrutamentu foun bele ajuda responde ba nesesidade eskola, liuliu se kolokasaun halo tuir área hanorin no nesesidade eskola ida-idak.
“Tuir TLCE nia haree, ita-nia eskola balun sei falta manorin, maibé rekrutamentu ME bele responde ba nesesidade ne’e,” nia esplika.
Diretora Servisu Edukasaun Munisipiu Aileu, Beatriz de Deus, mós hatete eskola balun iha munisípiu sei presiza aumenta númeru professores.
Nia hatete, rekrutamentu ne’ebé ME sei halo bele sai oportunidade atu koloka profesores ba eskola sira ne’ebé presiza.
(jac)
