DILI, STLTIMORLESTE.com – Ministériu Edukasaun (ME) iha ona planu atu harii rezidénsia ba profesór sira ne’ebé to’o agora aluga uma ka hela iha uma ne’ebé komunidade fó ba sira.
Diretór Nasionál Rekursu Umanu iha ME, Joao Amaral hato’o informasaun ne’e ba STL iha nia knaar fatin, Kinta (01/10/2026).
“Rezidénsia ne’e iha planu, no iha fatin balun komesa ona halo ona konstrusaun. Maibé ida ne’e kordena ho MAE, tanba autoridade munisipál balun komesa ona konstrui rezidénsia ba professór sira,” dehan Joao Amaral.
Nia hatutan katak, rezidénsia ba profesór sira importante atu fasilita sira-nia hela-fatin, tanba iha área balun professór sira sei hela iha uma alugada ka iha uma ne’ebé komunidade fó.
Enkuantu, Diretór Servisu Edukasaun Munisípiu Ainaro, Patricio da Costa Magno, hatete katak iha planu atu harii rezidénsia ba profesór sira iha tinan oin mai, maibé realizasaun projetu sei depende ba disponibilidade orsamentu.
“Ita prepara atu halo rezidénsia ba sira, tanba tinan oin ita atu halo planu halo rezidénsia ba ita-nia professór sira. Agora ita hein hela orsamentu. Ita halo por etapa deit, tanba depende ba ita-nia orsamentu,” dehan Patricio.
Tuir nia, to’o agora professór sira seidauk iha rezidénsia própria, nune’e balun tenke aluga uma iha komunidade no balun hela iha fatin ne’ebé komunidade fó ba sira.
Nia hateten katak, situasaun ne’e liu-liu akontese ba bolsista kandidatu professór sira, ne’ebé presiza hela besik eskola atu bele hala’o knar hanorin.
“Desde husi ME koloka mai, ita-nia professór sira seidauk iha rezidénsia. Entaun sira aluga deit komunidade nian uma, hodi bele hala’o sira-nia knar liu husi ensinu-aprendizajen ba ita-nia estudante sira,” nia haktuir.
Patricio hatutan katak, kona-ba númeru bolsista kandidatu professór sira ne’ebé hela iha uma alugada no ne’ebé komunidade fó fatin hela ba sira, presiza halo identifikasaun no atualizasaun dadus atu hatene númeru loos.
“Profesór sira hanorin iha eskola balun besik, no balun lae, maibé la’ós distánsia dook liu. Professór sira kada loron hala’o knar ho diak, lao tuir oráriu ne’ebé iha ona, tuir oras hanorin,” nia afirma.
Iha Munisípiu Liquiça, Diretór Servisu Edukasaun Munisípiu, Julio da Silva hatete katak, profesór sira balun hela iha uma komunidade nian no balun aluga uma ema nian, tanba to’o agora seidauk iha rezidénsia ba professór sira.
Tuir nia, kona-ba númeru professór sira ne’ebé aluga uma, presiza halo konfirma ho parte relevante sira atu hetan dadus ne’ebé loos.
“Ita-nia professór sira balun hela iha komunidade sira-nian uma, no balun sira aluga deit ema-nian uma, tanba to’o ohin loron seidauk iha rezidénsia ba professór sira. Kona-ba dadus hira mak aluga uma, nee presiza halo konfirma lolos ho parte relevante sira,” dehan Julio.
Entretantu, Diretór Servisu Edukasaun Munisípiu Bobonaro, Miguel Freitas, hatete katak presiza iha dadus loos kona-ba hela-fatin bolsista kandidatu professór sira ne’ebé koloka iha munisípiu refere.
“Hau hanoin kona-ba profesór bolsa kandidatu sira ne’ebé koloka mai iha Munisípiu Bobonaro, kona-ba sira-nia hela-fatin, nee presiza husu no iha dadus lolos, atu nune’e ita bele hatene hira mak aluga uma no hira mak hela ho komunidade sira,” dehan Miguel.
(jac)
