DILI, STLTIMORLESTE.com – Servisu Edukasaun Munisípiu Manatuto durante ne’e mantém liña koordenasaun servisu ne’ebé diak ho parte diresaun nasional iha Ministériu Edukasaun (ME).
Diretór Servisu Edukasaun Munisípiu Manatuto, Luis Antonio Soares hato’o informasaun ne’e ba STL liu husi telefóne, Kinta (01/10/2026).
Nia dehan, liña koordenasaun ne’e envolve Servisu Edukasaun Munisípiu hamutuk ho superintendente sira iha área formasaun, ne’ebé kontinua halo komunikasaun atu identifika no hato’o difikuldade sira ne’ebé eskola hasoru iha terenu.
“Liu husi superintendente rasik ita hato’o informasaun sira ne’e, atu nune’e sira bele relata liu husi sira-nia relatóriu trimestrál ba iha ME, atu nune’e sira bele tau importánsia no haree ba difikuldade ne’ebé ita-nia eskola sira hasoru durante ne’e. Iha liña koordenasaun ne’ebé diak,” nia esplika.
Luis hateten katak, parte edukasaun munisipál la’ós deit trata matéria ne’ebé tama iha sira-nia kompeténsia, maibé atividade sira ne’ebé ME hala’o iha Munisípiu Manatuto mos presiza hala’o ho koordenasaun.
“Iha buat balun ne’ebé ami hetan difikuldade, ami sempre hato’o informasaun ne’e ba sira, liu-liu ba iha diresaun nasional iha ME nasional. Dala ruma ami hato’o direta ka liu husi superintendente sira,” tenik nia.
Nia hatutan katak, liña koordenasaun servisu importante atu fasilita troka informasaun entre edukasaun munisipál no nasional, liu-liu bainhira eskola sira iha Manatuto hasoru difikuldade.
Iha Munisípiu Lautem, Diretór Servisu Edukasaun Munisípiu, Anibal Fernandes, mos dehan katak edukasaun munisipál kontinua kordena servisu ho parte nasional.
“Ami kordena servisu ho parte nasional, hodi informa ba malu, liu-liu ita-nia eskola ne’ebé hasoru difikuldade ruma,” dehan Anibal.
Enkuantu, Diretór Nasional Ensinu Sekundáriu iha ME, Benjamin Gomes da Cruz Fernandes, hatete katak durante ne’e edukasaun munisipál sira kontinua fó informasaun ba parte nasional kona-ba eskola sira ne’ebé hasoru dezafiu.
Nia hateten, dezafiu sira ne’e inklui kondisaun eskola, fasilidade no problema seluk ne’ebé presiza hetan atensaun husi parte relevante.
(jac)
