BAUCAU, STLTIMORLESTE.com – Eskola Sekundáriu Jeral (ESJ) Filial Dom Carlos Filipe Ximenes Belo, Quelicai Antigu, hasoru falta bee moos durante tempu bailoron, obrigatóriu orienta estudante kuru bee ba eskola.
Koordenador ESJ Filial Dom Carlos Filipe Ximenes Belo, Carlos Ximenes Filipe hateten, durante tempu bailoron, bee matan iha Postu Administrativu Quelicai Antigu nia débitu tun, halo asesu bee sai difísil ba nesesidade sanitária iha eskola.
“Tempu bailoron hanesan ne’e bee araska, entaun ami organiza estudante kuru bee husi uma lori mai,” Carlos ko’alia ba STL, Kinta (01/10/2026), iha resintu edifísiu Servisu Munisípal Edukasaun Baucau.
Nia esplika, eskola orienta estudante ida-idak lori bee másimu litru lima, la’ós kada loron, maibé haree ba bee rezervatóriu iha fatin sanitáriu menus no nesesidade atu aumenta hafoin orienta tan estudante sira kuru.
Carlos konsidera, problema ne’e akontese tanba bee matan iha, maibé sistema jestaun no distribuisaun bee seidauk organiza ho di’ak.
“Bee matan iha, maibé parte autoridade la organiza di’ak, tanba bee nia débitu menus tebes,” Carlos komenta.
Nia hateten, problema bee la’ós de’it akontese iha eskola, maibé komunidade Quelicai Antigu mós enfrenta situasaun hanesan.
Durante tempu bailoron, débitu bee matan sira tun, halo komunidade no edifísiu públiku hanesan Postu Saúde, Eskuadra Polísia, edifísiu administrasaun postu no fasilidade públika sira seluk enfrenta problema asesu ba bee moos.
Nia informa, problema ne’e komunidade balun tenke sosa bee husi kareta-tanki ne’ebé fa’an bee moos atu responde nesesidade loroloron.
Maibé, Carlos hateten, eskola la fasil sosa bee tanba orsamentu ne’ebé aloka limitadu no depende ba númeru estudante.
“Ami nia estudante limitadu, konsesaun eskola mós mínimu, tanba ne’e ami organiza estudante kuru bee.” Carlos argumentu.
Nia husu Ministériu Edukasaun atu haree no koordena ho parte kompetente hodi buka solusaun ba problema bee iha eskola.
Tanba asesu ba bee moos importante ba manutensaun higiene, saúde públika no kondisaun aprendizajen estudante sira.
Liga ho asuntu ne’e, STL tenta konfirma Diretor Servisu Munisípal Edukasaun Baucau, maibé to’o notísia ne’e prepara, seidauk hetan komentáriu.
(tom)
