DILI, STLTIMORLESTE.com – Ministériu Saúde sei haree infraestrutura, ekipamentu no profisionál Sentru Saúde Matebian atu hadi’a atendimentu saúde ba komunidade.
Visi-Ministru Saúde ba Fortalesimentu Institusional, José dos Reis Magno, hatete Ministériu Saúde sei tau matan ba infraestrutura no ekipamentu iha Sentru Saúde Matebian, inklui preparasaun profisionál saúde sira atu hala’o servisu.
“Ministériu Saúde haree no tetu hela, la’ós ba Sentru Saúde Matebian de’it, maibé mos fasilidade seluk ne’ebé konstrusaun remata ona iha tinan ida-ne’e,” dehan José dos Reis Magno ba jornalista iha Tower Fatuhada, Dili, Kinta (01/10/2026).
Nia hatete, iha Baucau, liuliu Quelicai, sei iha espansaun servisu tan, tanba Postu Administrativu ne’e iha unidade saúde rua, Matebian no Afassá, ne’ebé sei presiza planeamentu atendimentu.
Tuir nia, unidade saúde tuan sei uza nafatin atu fó tratamentu ba pasiente, enkuantu Ministériu Saúde sei kompleta ekipamentu no profisionál saúde sira iha Sentru Saúde Matebian.
Nia hatete, depois projetu remata, Ministériu Saúde sei halo avaliasaun ba infraestrutura no fasilidade sira atu garante unidade ne’e bele fó atendimentu saúde ne’ebé diak ba komunidade.
Xefe Suku Maluru, Nuno Florindo hatete, komunidade preokupa ho fasilidade iha Sentru Saúde Matebian, liuliu kama no kadeira ne’ebé konsidera seidauk sufisiente.
“Fasilidade uma ne’e foun, maibé fasilidade saúde iha uma laran la sufisiente, liuliu kama no kadeira atu apoia Sentru Saúde ne’e,” dehan Nuno Florindo.
Nia husu atu Sentru Saúde Matebian kompleta ho ekipamentu médiku, aimoruk no transporte, inklui kareta multi-funsaun atu transporta pasiente ba unidade saúde referál.
Tuir nia, transporte ne’e importante atu fasilita pasiente sira ne’ebé presiza hetan tratamentu iha Hospitál Rejionál ka Hospitál Nasionál.
Xefe Sentru Saúde Quelicai mos husu Ministériu Saúde atu halo rekrutamentu no destakamentu médiku, parteira no profisionál saúde sira ba Sentru Saúde Matebian.
Nia hatete, reforsu rekursu umanu, ekipamentu, aimoruk no transporte importante atu unidade saúde ne’e bele kumpre atribuisaun tuir estatutu Sentru Saúde no fó atendimentu adekuadu ba komunidade iha Postu Administrativu Matebian.
(dom)
