DÍLI, STLTIMORLESTE.com — Servisu Saúde Munisípiu Dili (SSMD) prepara sensibilizasaun, limpeza, abate no fumigasaun hodi prevene dengue iha área risku antes tempu udan.
Diretór SSMD, Mateus Pinto hatete, preparasaun importante antes tempu udan, tanba komunidade presiza alerta kona-ba risku dengue.
“Ba tinan 2027, ita la’ós halakon dengue, maibé halo prevensaun atu reduz kazu no evita aumentu maka’as.”
Mateus hatete, SSMD sei kontinua koordena atividade abate no fumigasaun, liuliu iha área sira ne’ebé identifika hanesan risku dengue.
Nia esplika, mudansa klimatika no udan bele aumenta risku dengue, nune’e prevensaun presiza envolve komunidade tomak.
“Abate lao nafatin, maibé komunidade tenke hamoos, hamaran no hakoi bee ne’ebé bele sai fatin moris ba susuk.”
Mateus hatete, SSMD mós prepara fumigasaun iha eskola balun iha Postu Administrativu Dom Aleixo, tuir orientasaun Ministériu Saúde.
Husi Janeiru to’o Setembru 2026, SSMD rejista kazu dengue hamutuk 2.778, ho pasiente na’in 17 mak mate.
Mateus deklara, númeru kazu dengue iha Setembru komesa tun kompara ho fulan hirak liubá, maibé númeru mate nafatin 17.
Nia subliña, nesesidade kontinua sensibilizasaun, liuliu iha área afetada, atu komunidade bele halo prevensaun husi uma-kain.
Área ne’ebé presiza atensaun inklui Manleuana, Comoro, Becora, Aimutin no fatin seluk ne’ebé iha risku dengue.
“Ita kontinua monitoriza dadus kazu iha kada área atu identifika fatin ne’ebé presiza intervensaun no prevensaun adisionál.”
Iha parte seluk, Vise-Ministru Saúde Fortalesimentu Institusionál, José Mango dos Reis hatete, programa Wolbachia iha Dili atinji ona 80%.
“Programa Wolbachia iha Munisípiu Dili atinji ona 80%, no ita espera rezultadu di’ak ba prevensaun dengue.”
José Mango hatete, programa Wolbachia sei apoia esforsu prevensaun dengue, liuliu iha Munisípiu Dili.
Nia esplika, programa ne’e implementa iha Dili hanesan projetu pilotu Governu hamutuk ho parseiru sira.
Nia hatete, rezultadu programa ne’e sei sai baze atu konsidera espansaun ba munisípiu seluk iha futuru.
(jen)
