DILI, STLTIMORLESTE.com – Prezidente Repúblika (PR), José Ramos-Horta entrega sertifikadu rekoñesimentu no prémiu ba foin-sa’e 11 ne’ebé manán dezafiu paz nian.
Inisiativa “Fraze Ida ba Fabor Paz nian ba Asembleia Jerál Nasoins Unidas” konvida foin-sa’e sira ho idade 11 to’o 17 atu fahe hanoin.
Foin-sa’e sira hato’o mensajen ho sira-nia liafuan rasik, hodi promove paz, toleránsia, solidariedade, direitus umanus no kooperasaun internasionál.
Mensajen sira ne’e sei hato’o ba líder mundiál sira iha Asembleia Jerál Nasoins Unidas, ne’ebé hala’o ona sessaun ba dala 81.
Manán-na’in na’in-11 mak Olgita Graçia Boquifai Soares Lemos, Elisabeth Brilliant de Deus Abi, Emilly Javania Amar Guterres dos Santos no Irabela Teresa Galhos Junior.
No seluk tan mak Victórya Marie da Grace Guterres de Andrade, Natalia Viviana Leong Guterres, Cristian Fernandes Doky, Melkyvido Hermenegildo Talo Mau no Carisa Nataliena da Costa Ferreira.
Meychia de Fatima Calado Amaral no Solomon Bravery Horta mos tama iha lista manán-na’in sira, ho idade entre tinan 12 no 17.
Fraze sira hosi manán-na’in sira reflete esperansa foin-sa’e Timor-Leste nian ba mundu ne’ebé labarik sira bele moris ho paz.
Mensajen sira mos hato’o hakarak atu moris livre husi funu, ódiu no destruisaun, liuhusi ko’alia kona-ba paz no unidade.
Inisiativa ne’e fó espasu ba foin-sa’e sira atu uza sira-nia kreatividade no hanoin kritiku, hodi kontribui ba promosaun paz iha sosiedade.
Partisipasaun foin-sa’e sira nian konsidera importante tanba sira sei sai gerasaun ne’ebé kontinua harii sosiedade bazeia ba respeitu no kooperasaun.
Paz la’ós de’it responsabilidade governu sira nian, maibé envolve mos komunidade, família, juventude no instituisaun edukasaun iha nasaun ida-idak.
Iha konteksu Timor-Leste, mensajen kona-ba paz iha valor importante tanba nasaun ne’e liu ona hosi istória konflitu no luta naruk ba independénsia.
Esperiénsia istórika ne’e sai hanesan lisaun ba gerasaun foun atu valoriza dame, toleránsia, diálogu no respeitu ba direitus umanus.
Asembleia Jerál Nasoins Unidas nu’udar fórum internasionál ne’ebé reúne nasaun sira hodi ko’alia kona-ba kestaun globál, inklui paz, seguransa no direitus umanus.
Tanba ne’e, oportunidade ba foin-sa’e Timor-Leste sira atu hato’o mensajen iha kontestu internasionál bele sai espasu atu rona sira-nia hanoin.
Liuhusi inisiativa ne’e, Prezidente Ramos-Horta fó oportunidade ba foin-sa’e sira atu hato’o sira-nia aspirasaun ba mundu ne’ebé hakmatek no unidu liután.
Dezafiu ne’e mos hatudu katak liafuan foin-sa’e sira nian bele sai parte hosi esforsu atu promove kultura paz no komprensaun entre ema sira.
No esperansa hosi foin-sa’e sira ne’e la limita de’it ba Timor-Leste, maibé mos hato’o mensajen kona-ba futuru mundu ne’ebé livre husi funu, ódiu no destruisaun.
(eme)
