DILI, STLTIMORLESTE.com – Prezidente Repúblika (PR), José Ramos-Horta hasoru Embaixadór Japaun ba ASEAN hodi hametin amizade no kooperasaun entre nasaun rua.
Prezidente Repúblika José Ramos-Horta, iha Kinta (01/10/2026), simu Embaixadór Extraordináriu no Plenipotensiáriu Misaun Japaun hamutuk ASEAN, Yonetani Koji.
Enkontru ne’e hala’o iha Palásiu Prezidensiál Nicolau Lobato, Bairru Pite, Dili, ho objetivu atu ko’alia kona-ba relasaun bilateral.
Bainhira remata enkontru, Yonetani Koji hatete ba jornalista katak nia sente priviléjiu tanba bele hasoru Prezidente Repúblika.
“Ohin hau sente priviléjiu atu informa ba Sua Exelénsia Prezidente kona-ba Japaun nia apoiu tomak ba Timor-Leste nia adezaun ba ASEAN.”
Nia hatete katak Japaun simu ho kontente Timor-Leste nia adezaun ba ASEAN no prontu apoia Timor-Leste iha jornada foun.
“Ami mós simu ho kontente Timor-Leste nia adezaun ba ASEAN no hato’o ami nia kompromisu tomak ba nia jornada iha ASEAN.”
Yonetani Koji mós hato’o apresiasaun ba Timor-Leste nia apoiu no relasaun amizade ne’ebé durante tinan barak harii ho Japaun.
Nia hatete katak relasaun bilateral entre Japaun no Timor-Leste kontinua lao di’ak no fó benefísiu ba dezenvolvimentu nasaun rua.
Kooperasaun Japaun ho Timor-Leste envolve área importante sira, inklui agrikultura, ekonomia, saúde, infraestrutura no dezenvolvimentu rekursu umanu.
Japaun mós durante tinan barak fó asisténsia no kooperasaun ba Timor-Leste, liuliu iha área dezenvolvimentu sosial no ekonomia.
Relasaun entre Timor-Leste no Japaun bazeia mós iha amizade no solidariedade ne’ebé harii liuhusi istória no esperiénsia nasaun rua.
Japaun sai parseiru importante ba Timor-Leste iha prosesu dezenvolvimentu, liuhusi programa kooperasaun no asisténsia téknika iha área oioin.
Kooperasaun ne’e kontinua dezenvolve, agora ho perspetiva foun tanba Timor-Leste hahú integra ho ASEAN nu’udar membru foun.
Yonetani Koji hatete katak, vizita ba Timor-Leste mós atu haree área sira ne’ebé bele hetan apoiu liután iha kontestu Timor-Leste nia partisipasaun iha ASEAN.
Fokus ida mak atu buka oportunidade foun ba diversifikasaun ekonomia no hametin kooperasaun entre Timor-Leste, Japaun no nasaun membru ASEAN sira.
“Ami hakarak tebes atu kontinua apoiu iha asisténsia longu prazu ba Timor-Leste iha nia kontestu iha ASEAN laran.”
Timor-Leste nia integrasaun iha ASEAN loke oportunidade foun ba kooperasaun ekonomia, komérsiu, investimentu, edukasaun no dezenvolvimentu ho nasaun sira iha rejiaun.
Japaun, nu’udar parseiru ASEAN, kontinua fó atensaun ba Timor-Leste nia papel foun iha komunidade rejionál no oportunidade kooperasaun iha futuru.
(eme)
