DILI, STLTIMORLESTE.com – Prezidente Komisaun Nasionál Eleisaun (CNE), José Agostinho da Costa Belo, promete servisu ho imparsialidade hodi garante transparénsia eleisaun Prezidensiál 2027.
José Agostinho da Costa Belo halo deklarasaun ne’e hafoin Prezidente Parlamentu Nasionál (PN), Maria Fernanda Lay, fó pose ba nia no komisáriu CNE sira ba mandatu 2026–2031, iha Dili, Sesta-feira (02/10/2026).
“Mandatu ida-ne’e ami sei hala’o tuir ami-nia juramentu, ne’ebé kompromete ami atu servisu ho imparsialidade,” afirma José Belo.
Nia dehan, CNE sei hala’o knaar ho responsabilidade no la’o hamutuk ho apoiu polítiku husi bankada sira iha Parlamentu Nasionál.
“Votasaun foin lalais ne’e hatudu konkordánsia boot. Ami simu kritika husi deputadu sira nu’udar apoiu atu hadi’a ami-nia servisu,” dehan José Belo.
Nia subliña katak prioridade CNE nian agora mak prepara eleisaun Prezidensiál, ne’ebé sei realiza iha Marsu 2027. Tuir nia, Prezidente Repúblika sei dekreta data eleisaun iha Janeiru.
“CNE tenke servisu ho di’ak atu lori sidadaun ida ho kualidade ba Aitarak Laran,” nia afirma.
José Belo mós hateten katak Timor-Leste enfrenta dezafiu atu prepara lideransa nasionál ne’ebé bele reprezenta nasaun iha nivel internasionál, inklui iha ASEAN iha 2029.
Tanba ne’e, nia kompromete katak CNE sei prepara eleisaun ho dignidade, transparénsia no responsabilidade, hodi garante kredibilidade prosesu eleitorál.
Nia informa katak CNE mós prontu atu hala’o eleisaun podér lokál iha tinan oin, maibé sei hein desizaun Governu kona-ba munisípiu ne’ebé sei realiza eleisaun dahuluk.
Iha fatin hanesan, Prezidente PN, Maria Fernanda Lay, hato’o parabéns ba José Belo no estrutura CNE sira ne’ebé simu pose ba mandatu foun.
“Ho tomada pose ida-ne’e, CNE hahú mandatu foun, no servisu boot hein hela ita-boot sira iha eleisaun tuirmai,” Maria Fernanda Lay dehan.
Nia afirma katak CNE nu’udar órgaun deliberativu ne’ebé superviziona resenseamentu no aktu eleitorál, hodi garante kredibilidade instituisaun demokrátika tuir lei.
Maria Fernanda Lay mós hateten katak rekomendasaun husi observadór internasionál kona-ba eleisaun sira antes ne’e tenke sai referénsia atu hadi’a prosesu eleitorál iha futuru.
“Hau hakarak hato’o katak Timor-Leste hetan rekoñesimentu internasionál tanba eleisaun sira iha pasadu lao demokrátiku no pasífiku,” nia afirma.
Prezidente PN espera katak eleisaun sira tuirmai sei kontinua hala’o ho di’ak, hodi hametin demokrasia no kredibilidade prosesu eleitorál iha Timor-Leste.
(alb)
