DILI, STLTIMORLESTE.com – Eis Deputadu Partidu Sosial Demokrata (PSD) no Eis Koordenadór CNRR Konsulta Popular 1999, Leandro Isaac, hatete RDTL presiza hametin sistema justisa ne’ebé oras ne’e daudaun sai sabraut.
Nia hatete, situasaun ne’e sai preokupante bainhira Meritíssimus Juízes sira tenke hola inisiativa rasik hodi hakerek karta no haruka ba Primeiru Ministru Kay Rala Xanana Gusmão hodi konta tuir situasaun rejime judisiál iha RDTL, enkuantu Prezidente Repúblika, Ramos Horta nonok hela.
“Oinsá mak bele mosu krize iha RDTL nia sistema judisiál ne’ebé oras ne’e daudaun sai sabraut, Prezidente Republika nonok hela, Meritíssimus Juízes sira hola inisiativa hodi hakerek surat no haruka ba Primeiru Ministru, Xanana hodi konta tuir situasaun rejime judisiál iha RDTL,” dehan Leandro Isaac ba STL, Sesta (02/10:2026).
Nia subliña katak, buat ruma la’o ladún lós iha sistema ne’e, no husu oinsá ho justisa iha Timor-Leste agora no ba oin.
“Buat ruma la’o ladún lós iha justisa, oinsá futuru Timor-Leste, RDTL la presiza tribunál ona ka, tanba laiha krime hanesan Finlándia, kadeia taka tanba laiha ema sala.”dehan nian.
Tuir Leandro Isaac, se laiha krime no kadeia taka, ne’e di’ak, maibé realidade la hanesan ne’e, tanba ne’e povu tomak tenke preokupa ho situasaun ida ne’e.
“Povu tomak tenke preokupa ho situasaun ida ne’e,” nia konklui.
Iha parte ketak Observadór Polítika, Antoninho Freitas konsidera preokupasaun ne’e pertinente tebes, tanba bainhira juízes sira tenke hakerek karta ba ezekutivu, ne’e hatudu iha ona falha institusionál ne’ebé tenke rezolve lalais.
“Bainhira Meritíssimus Juízes sira hola inisiativa hakerek karta ba Primeiru Ministru, ne’e hatudu katak sistema judisiál hasoru hela problema internu. Estadu labele nonok,” dehan Antoninho Freitas.
Antoninho hatutan katak, Estadu tenke garante independénsia judisiál, maibé mós tenke garante kondisaun servisu ba juízes sira, hodi justisa bele la’o ho kredibilidade iha povu nia oin.
Entretantu, Akademista UNPAZ, Nelson de Carvalho, hatete situasaun ne’e hatudu fragilidade, iha koordenasaun entre órgaun soberania sira.
“Se Tribunál sira to’o hakerek karta ba Governu, ne’e hatudu sistema checks and balances komesa la balansu ona. Justisa labele husu tulun hosi polítika, justisa tenke hetan garantia hosi Konstituisaun,” dehan Nelson de Carvalho.
Nelson hatutan katak, solusaun di’ak liu mak diálogu institusionál entre Prezidente Repúblika, Primeiru Ministru, no Konsellu Superiór Majistratura Judisiál hodi evita krize boot ba oin.
(car)
