DILI, STLTIMORLESTE.com – Timor-Leste Coalition Education (TLCE) husu Governu liu husi Ministeriu Edukasaun (ME) atu kontinua hadi’a infraestrutura eskola, inklui kondisaun edifísiu no fasilidade pratika ba estudantes sira.
Diretor Ezekutivu TLCE, Jose Monteiro hato’o pedidu ne’e ba STL, Sesta (02/10/2026).
“Hau hanoin ita nian infraestrutura eskola nee presiza hadia nafatin. Alende hadia infraestrutura fiziku sira, presiza mos kontinua hadi’a kondisaun eskola balun ne’ebé to’o agora seidauk diak. Presiza kria kondisaun eskola ne’ebé diak ba ita nian estudantes sira,” dehan Jose Monteiro.
Tuir Jose Monteiro, kondisaun eskola balun presiza reabilita no balun presiza halo konstrusaun foun, hodi bele fasilita prosesu ensinu-aprendizajen iha eskola ida-idak.
Nia mos husu atu ministeriu relevante sira fó apoiu ba eskola ne’ebé seidauk iha fasilidade pratika sufisiente.
“Iha eskola balun kondisaun diak ona, maibé iha parte balun seidauk. Nune’e ministeriu relevante presiza haree no hadia, fó apoiu nafatin fasilidade pratika nian ba ita nian eskola ne’ebé sei falta fasilidade. Buat hirak nee hotu mak ita bele garante ba kualidade edukasaun,” nia informa.
Enkuantu ne’e, Diretor Servisu Edukasaun Munisipiu Bobonaro, Freitas, hatete katak infraestrutura eskola iha Bobonaro balun hadia ona, liuliu eskola pre-eskolár sira ne’ebé foin loke no halo konstrusaun foun.
Maibé, nia hatete katak iha mos sala aula balun ne’ebé sei uza didin ho bebak, no iha nesesidade kona-ba bee no saneamentu.
“Ita nian eskola balun halo konstrusaun foun, nee mak pre-eskolár ne’ebé loke foun. Nee presiza mos professor atu hanorin. Maibé iha parte balun ita nian sala aula sei uza ho bebak. Eskola sira iha bee mos, saneamentu,” nia dehan.
Freitas hatete katak, eskola balun presiza reabilitasaun no balun presiza konstrusaun foun. Tuir nia, asuntu infraestrutura eskola ne’e tama iha kompeténsia ME nivel nasionál.
Nia esplika katak, Servisu Edukasaun Munisipiu simu no hatama ba nivel nasionál problema infraestrutura ne’ebé eskola sira enfrenta.
(jac)
