DILI, STLTIMORLESTE.com – Estudante finalista feto nain 3 husi Eskola Sekundária Nobel da Paz, ne’ebé iha kondisaun isin-rua, sei tuir Ezame Nasional no Ezame Lokal iha loron 19 fulan Outubru 2026.
Fundador Eskola Nobel da Paz, Jeremias P. de Jesus hato’o informasaun ne’e ba STL iha nia knar-fatin, Sesta (02/10/2026).
“Iha ami nian estudante finalista nain tolu mak ho kondisaun gravida hela. Maibé sira nain tolu nee antes eskola iha fatin seluk, sira transfere mai eskola nee iha segundu periodu. No tuir informasaun katak, ida partus ona, maibé família seidauk mai fó hatene parte eskola,” nia informa.
Jeremias hatete katak, naran estudante finalista sira nian submete ona ba edukasaun, hodi nune’e sira bele partisipa iha Ezame Nasional no Ezame Lokal iha loron 19 Outubru.
Nia mos hatete katak, preparasaun eskola ba ezame lao hela, ho professores kada disiplina kontinua fó aula ba estudante sira.
Parte eskola nian, tuir nia, prepara ona fasilidade hanesan meza, kadeira no sala aula ba nesesidade ezame.
Jeremias hatete, total estudante finalista ne’ebé sei partisipa iha Ezame Nasional no Ezame Lokal ba tinan 2026 mak 614 husi ensinu sekundária, 254 husi CT, 360 husi CSH no 297 husi ensinu baziku.
Total estudante iha Eskola Sekundária Nobel da Paz hamutuk 1.174, enkuantu estudante ensinu baziku hamutuk 347.
(jac)
