DILI, STLTIMORLESTE.com – Eskola Sekundária Nobel da Paz husu apoiu husi inan-aman estudante sira atu kontinua kontrola no orienta oan sira, liuliu atu asegura estudante sira tama eskola no tuir aula ho diak.
Fundador Eskola Nobel da Paz, Jeremias P. de Jesus hato’o pedidu ne’e ba STL iha nia knar-fatin, Sesta (02/10/2026).
Jeremias dehan katak, eskola labele servisu mesak, maibé presiza mos kolaborasaun husi inan-aman estudante sira atu kontrola oan sira antes sira mai eskola.
“Ami husi parte eskola nian husu nafatin apoiu ba inan-aman estudante sira, para dader nee haree oan sira mai sedu iha eskola, tuir aula husi ita nian professores. La’ós to’o ezame mak mai iha eskola, ita presiza servisu hamutuk hodi kontrola ita nian oan sira,” nia dehan.
Nia hatete katak, iha tempu uluk, estudante balun mai eskola maibé hamriik deit iha liur, inklui besik estrada boot. Maibé, tuir nia, hahú iha mudansa ona iha komportamentu estudante sira.
Aleinde husu apoiu kona-ba frekuénsia estudante sira, Jeremias mos husu inan-aman atu selu propina eskola kada fulan tuir montante ne’ebé determina ona.
Nia esplika, propina estudante sira nian uza atu suporta pagamentu salariu professores kada fulan.
“Hau hanoin kona-ba propinas kada fulan nee, husu inan-aman estudantes sira nian, ita labele deve malu. Tanba lori propinas nee mak ita sei selu professores nian salariu kada fulan. Tanba nee, husu estudantes kada fulan presiza selu propinas, ho montante ne’ebé iha ona, tantu ba estudantes sekundária no ensinu baziku,” nia dehan.
(jac)
