DÍLI, STLTIMORLESTE.com – Sentru Formasaun COJUCAD fasilita formasaun Planeamentu Pastoral ho baze Biblia ba foin-sa’e sira, atu hametin sira nia misaun iha igreja no komunidade.
Formasaun nee hala’o husi Comisaun Juventude Catolika Arquidiocese Dili (COJUCAD), liu husi Sentru Formasaun COJUCAD, ho tema “Planeamentu Pastoral ho Baze Biblia ba Foin-sa’e”, iha Katedral Dili, Sabadu (3/10/2026).
Oradora Madre Silvina Araujo Soares Tomas, SPC hatete, tema ne’e importante ba foin sa’e sira tanba sira presiza komprende oinsá atu organiza sira nia moris no prepara-an antes atu fahe Maromak nia liafuan iha komunidade.
“Hau sente kontente tanba ohin bele kolabora ho foin sa’e lubuk ida ne’ebé partisipa iha formasaun ida-ne’e.”
Me. esplika, Planeamentu Pastoral tenke iha baze ba Biblia, ensinamentu no Magistériu Igreja, tanba Biblia sai orientasaun ba foin-sa’e sira atu halo planu, orienta sira nia moris no atinji metas iha misaun.
Tuir Madre Silvina, liafuan pastoral mai husi liafuan pastor, ne’ebé refere ba knaar atu akompaña, tulun, enkoraja no motiva ema sira atu hakbesik ba Maromak.
Nia hatete, foin sa’e COJUCAD iha papel importante iha Arquidiocese Dili, liuliu atu fahe no hatutan Maromak nia liafuan ba maluk sira seluk, no kontinua hala’o atividade pastoral iha komunidade.
“COJUCAD hala’o knaar pastoral liu husi formasaun espiritual no vokasional ba joven sira.
Ida-ne’e fasilita joven sira atu deskobre sira nia moris loron-loron no komprende saida mak Maromak hakarak,” nia hatete.
Madre Silvina subliña katak, misaun atu haklaken Maromak nia liafuan la’ós responsabilidade Padre no Madre sira de’it, maibé responsabilidade ema hotu ne’ebé simu Sakramentu Batizmu.
“Ema hotu hala’o misaun.
Ema ne’ebé simu Sakramentu Batizmu soi ona atu hola parte iha Kristu nia misaun no haklaken Maromak nia liafuan.”
Nia mós esplika katak, Planeamentu Pastoral iha Arquidiocese Dili la’ós atu hala’o misaun tuir de’it ema nia hakarak, maibé presiza iha dalan no guiaun ne’ebé orienta ema atu lao to’o ba objetivu.
Tanba ne’e, nia enkoraja foin-sa’e sira atu fó tempu ba Maromak, hadomi Biblia, lee no medita Maromak nia liafuan, atu bele hetan orientasaun ba sira nia moris iha situasaun oioin.
Madre Silvina sujere foin-sa’e sira fó tempu pelumenus minutu 10 ka 15 kada loron hodi lee no medita Biblia, tanba liu husi meditasaun, sira bele rona kle’an liután Maromak nia liafuan no hetan orientasaun ba sira nia desizaun no moris loron-loron.
(joa)
