DÍLI, STLTIMORLESTE.com – Domin no respeitu ba inan-aman sai fundamentu importante ba moris foin-sa’e, tanba liu husi família sira aprende domin no fiar Maromak.
Liafuan hirak ne’e hato’o husi Madre Salvina Araujo Soares Tomas, SPC ba STL iha Katedral Dili, Segunda-feira (5/10/2026).
Nia hateten, respeitu ba inan-aman no maluk sira importante tebes, maibé fundamentu primeiru ba ema, liuliu foin-sa’e, mai husi inan-aman.
“Domin inan-aman importante tebes ba oan.”
Madre Salvina esplika katak, dala barak oan sira bele haree de’it fraqueza ka limitasaun inan-aman, maibé la komprende katak iha kotuk husi asaun hirak ne’e iha domin.
Nia dehan, domin inan-aman bele sai hanesan “osan mean” ba foin-sa’e sira iha situasaun moris oioin. Bainhira oan sai husi uma ba eskola, servisu ka viajen, liafuan no orasaun inan-aman nian bele sai fonte korajen.
“Dader bainhira oan sai ba eskola ka servisu, inan-aman sei hatudu laran taridu no dehan: ‘Hau nia oan, sai ba diak. Estuda ho diak. Maromak akompaña o iha viajen,’” nia hateten.
Madre Salvina mós hateten katak, inan-aman hakarak oan sira sai ema diak, la’ós de’it riku iha soin mundu nian, maibé riku iha lalehan, moris ho fiar, maturidade no obediénsia ba Maromak.
Nia fó ezemplu katak, bainhira oan ida monu iha dezafiu ka problema, ema seluk bele ajuda, maibé inan-aman mak normalmente mai uluk atu husu kona-ba kondisaun no fó apoiu.
Madre Salvina mós fahe esperiénsia pessoal kona-ba liafuan enkorajamentu husi nia aman ne’ebé agora mate ona. Bainhira nia sei eskola, nia aman fó liafuan firme katak nia la bele husik eskola.
Maski depois nia aman mate no nia tenke kontinua eskola dook husi inan, liafuan enkorajamentu ne’ebé aman fó uluk sai hanesan forsa ba nia to’o ohin loron.
Nia dehan, esperiénsia ne’e hatudu katak, maski dala ruma oan la sente ka la komprende domin inan-aman, domin ne’e bele hela nafatin iha nia moris.
Tuir nia, oan sira presiza komprende situasaun moris inan-aman, liuliu bainhira husu buat ruma no inan-aman la bele fó kedas.
Nia husu oan sira atu la hirus ka obriga inan-aman, maibé haree uluk situasaun família.
Madre Salvina mós hateten katak, domin inan-aman boot tebes, tanba Maromak uza inan-aman hodi hatudu nia domin ba oan sira.
Nia fó ezemplu, inan feto lori oan iha nia knotak durante fulan sia, enfrenta sakrifísiu no difikuldade, maibé nafatin kuidadu no hadomi oan to’o moris.
Tanba ne’e, nia apela ba foin-sa’e sira atu valoriza, respeita no agradese sakrifísiu inan-aman, tanba domin hirak ne’e bele sai dalan ida hodi deskobre domin Maromak nian iha moris loroloron.
(joa)
