DÍLI, STLTIMORLESTE.com – Bee Timor Leste (BTL) kontinua hadi’a sistema fornese bee no estende servisu ba postu 16, hodi aumenta asesu komunidade no reseita Estadu.
Diretór Operasaun no Manutensaun Bee no Saneamentu BTL, E.P., Aleixo dos Santos hato’o informasaun ne’e ba STL iha Kaikoli, Segunda-feira (5/10/2026).
“BTL kontinua hadi’a sistema bee atu aumenta asesu komunidade no kontribui ba reseita Estadu.”
Aleixo hateten, BTL iha estrutura no planu negósiu rasik, ne’ebé orienta servisu bee atu kontribui ba reseita no kofre Estadu.
Nia esplika, durante ezisténsia BTL, servisu bee foka liu ba área urbana, enkuantu área rurál konsidera barak liu hanesan servisu sosial.
“Ita fornese bee, maibé la hetan reseita; tanba ne’e, Governu fó tarefa atu hadi’a sistema bee husi postu to’o kapitál nasaun.”
Aleixo hateten, BTL komesa estende servisu ba postu 16, ho uma-kain rihun ualu resin rejistadu ona hanesan kliente.
Kliente sira uza metru kontadór no prontu atu kontribui ba reseita Governu liuhusi servisu bee ne’ebé fornese BTL.
Nia hateten, BTL iha sistema iha munisípiu 11 no kontinua halo melhoramentu, hodi garante komunidade asesu ba bee nafatin.
BTL mós iha planu investimentu iha Munisípiu Lautém no Manufahi, ne’ebé atualmente implementasaun projetu sira la’o hela.
Kliente sira ne’ebé asesu ona ba bee iha Lautém no Manufahi hamutuk uma-kain rihun sia.
Iha Munisípiu Dili, kliente sira ne’ebé asesu ba bee hamutuk rihun sanulu resin sia, enkuantu kliente rihun rua resin rejistadu iha sistema IT.
Aleixo hateten, presiza harmoniza dadus kliente hotu atu sistema bele lao di’ak, tanba Sensus 2022 hatudu uma-kain besik 58,000 iha kapitál Dili.
Kuaze Dili laran asesu ona ba bee, maibé kliente balun seidauk tama iha sistema BTL tanba prosesu rejistu no modernizasaun sistema.
Tanba ne’e, BTL planeia hadi’a sistema ezistente hodi aumenta asesu komunidade ba bee no permite Governu aumenta investimentu.
Aleixo hateten investimentu setor bee ne’ebé planeia husi 2020 to’o 2024 nia montante besik US$ 300 millaun, maibé implementasaun hahú foin iha 2025.
Nia hateten etapa primeiru planeia implementa investimentu iha munisípiu lima, inklui Dili, Lautém, Viqueque, Baucau no Manufahi.
Maibé, projetu sira seidauk implementa hotu tanba presiza halo estudu kle’an no prepara rekursu antes hahú implementasaun.
Nia hatutan, investimentu setor bee tenke tuir prosesu Governu, inklui avalia sufisiénsia rekursu bee no viabilidade projetu.
Agora, Lautém no Manufahi mak munisípiu rua ne’ebé implementasaun investimentu la’o hela, enkuantu Viqueque, Baucau no Dili sei iha prosesu preparasaun.
(joa)
