AMBENO, STLTIMORLESTE.com – Diresaun Rejionál Serbisu Planeamentu RAEOA prepara planu zonal 2027, ho prioridade ba asaun estratéjika ne’ebé responde ba nesesidade povu no haburas dezenvolvimentu sustentável iha Oecusse.
Diretor Diresaun Rejionál Serbisu Planeamentu, Cândido dos Reis Amaral, hateten katak prosesu elaborasaun planu zonal ba tinan 2027 sei bazeia ba asesmentu tékniku, dadus konkretu no koordenasaun entre instituisaun sira.
Nia hato’o informasaun ne’e ba STL iha Gabinete Autoridade Oebau, Suku Costa, Postu Administrativu Pante Macassar, RAEOA, Segunda-feira (05/10/2026), no esplika katak planeamentu sei fó atensaun ba prioridade sira ne’ebé presiza asaun imediata.
“Ita promove interese no ita tenke halo aprovasaun no foti asaun ba povu nia moris,” dehan Cândido dos Reis Amaral.
Nia hateten katak servisu planeamentu la’ós de’it halo vizita ba postu administrativu sira, maibé presiza mós koordenasaun ho organizasaun naun-governamentál (ONG) no instituisaun relevante sira, inklui Australian Defence Force, tuir nesesidade no prosedimentu ne’ebé aplika.
Antes hala’o vizita ba Postu Administrativu Nitibe, Pásabe, Oesilo no Pante Macassar, equipa planeamentu sei halo asesmentu no preparasaun téknika hodi identifika lakuna no determina asaun adisionál.
“Buat ida ne’ebé ita tenke halo ho seriedade mak asesmentu no planeamentu ho tékniku sira, hamutuk ho polísia no servisu relevante sira, atu halo análize ba servisu ne’ebé iha. Depois, ita tenke fó prioridade ba asuntu sira ne’ebé importante,” nia dehan.
Diretor ne’e mós admite katak iha servisu balu seidauk bele implementa, tanba ne’e instituisaun presiza identifika servisu urgente no prepara solusaun ne’ebé apropriadu.
Nia subliña katak dadus no informasaun relevante sira tenke rekolla, organiza no analiza ho sistemátiku antes halo mapamentu, atu garante katak planu sira iha baze informasaun ne’ebé klaru.
“Ita nia Prezidente Autoridade Rejiaun Administrativa Espesial Oecusse-Ambeno mós fó alerta kona-ba funsaun no servisu sira ne’ebé tenke kontinua. Tanba ne’e, hau nuudar Diretor Planeamentu apela atu servisu hamutuk entre parte hotu,” nia afirma.
Nia fó énfaze mós ba setor alimentar atu prepara resposta ba nesesidade komunidade, inklui planeamentu ba futuru iha área edukasaun no kuidadu ba ambiente.
Tuir Cândido, planeamentu sei la para iha tinan 2027, maibé sei haree mós ba nesesidade dezenvolvimentu iha tinan sira tuirmai, inklui preparasaun servisu to’o Dezembru 2028.
“Pergunta mak, saida mak ita sei hatudu no fó ba komunidade? Ita tenke haree kona-ba funsaun no servisu sira ne’ebé presiza fó prioridade,” nia dehan.
Iha parte seluk, Prezidente Autoridade RAEOA, Regio da Cruz Salu, iha serimónia hasae bandeira semana dahuluk fulan Outubru, iha Kampu Futebol Oebau, husu ba lider no funsionáriu sira atu hala’o sira-nia responsabilidade ho seriedade hodi garante servisu públiku lao ba oin.
“Hau husu ba Sekretáriu Rejionál sira, Diretor Rejionál sira atu servisu fó fuan ba dezenvolvimentu Estadu ida ne’e, liu-liu iha RAEOA atu lori nasaun ne’e ba oin,” dehan Regio da Cruz Salu.
Enkuantu ne’e, Gabriel Elu husu ba autoridade sira iha RAEOA atu prepara planu dezenvolvimentu ho di’ak, liu husi setores infraestrutura, edukasaun, saúde no setores seluk, hodi kontinua promove dezenvolvimentu no melhora moris komunidade.
(jos)
