DILI, STLTIMORLESTE.com – Kompanhia Esperansa Timor Oan (ETO) hato’o klarifikasaun ida ba Redasaun STL Online kona-ba notísia ne’ebé publika foin lalais ne’e. Tuir parte ETO nian, informasaun ne’ebé sai la refleta realidade no foti husi fontes ne’ebé la iha ligasaun ho empreza refere.
Iha karta ne’e, ETO salienta katak la iha konfirmasaun direta ho parte empreza nian antes publikasaun, nune’e husu atu halo koresaun ba konteúdu ne’ebé sirkula.
Redasaun STL, liuhusi Managing Editor Joseph Koa, foti responsabilidade ba falha iha prosesu verifikasaun ne’e, hodi hato’o pedidu deskulpa ba parte ETO nian. Tuir investigasaun husi redasaun nian ba jornalista, jornalista rekonhese duni katak nia la halo entrevista ho parte kompetente hodi fó deklarasaun maibe halo notisia obserbasaun deit iha terenu no intervista deit ema neebe ense mina.
“Redasaun hato’o pedidu deskulpa ba parte ETO kona-ba falha iha prosesu foti informasaun ba matéria ne’e. Ami sei fó atensaun no orientasaun ba jornalista ne’ebé envolve, hodi nune’e bele hasa’e liután padraun verifikasaun no mekanizmu kontrolu iha redasaun laran,” dehan Joseph Koa.
Iha remata, Joseph Koa hateten esperansa katak karta ratifikasaun ne’e la afeta relasaun entre ETO no STL iha futuru, no kooperasaun entre parte rua bele kontinua ho baze ba komunikasaun no respeitu mútuu.
(redasaun)
