DILI, STLTIMORLESTE.com – Reitor Instituto Ciências da Saúde (ICS), Leão Borges hatete katak, pagamentu subvensaun públika ba faze daruak ho valór 50%, seidauk hetan informasaun kona-ba tama ona ka seidauk, nune’e presiza halo konfirmasaun ho parte finansas.
Leão Borges hato’o informasaun ne’e ba STL, Tersa-feira (06/10/2026), no hatete katak nia sei konfirma uluk ho parte finansas hodi hatene kona-ba situasaun pagamentu subvensaun públika refere.
“Konaba subvensaun públika ba faze daruak nian pursentu 50, hau seidauk iha informasaun. Nune’e, hau presiza konfirma ho parte finansas husi ami nian, atu hatene osan nee tama ona ka seidauk,” nia dehan.
Reitor ICS hatete mós katak, instituisaun uza subvensaun públika ne’e ba programa prioridade tolu, mak apoiu ba dosentes, estudantes no atividade peskiza.
Enkuantu, Reitor Instituto Ciências da Saúde (ICS), Sebastião Pereira, hatete katak subvensaun ne’ebé Ministeriu Ensinu Superior, Ciência e Kultura (MESSK) fó ba instituisaun ensinu superior, tenke uza tuir nesesidade instituisaun ida-idak nian.
“Subvensaun públika ne’ebé ministeriu ensinu superior fó apoiu, atu instituisaun bele ezekuta tuir nesesidade ida-idak nian. Ezekusaun hotu tenke halo relatóriu atu submete ba MESSK,” nia komenta.
Iha parte seluk, Reitor Dili Institute of Technology (DIT), Salustiano dos Reis Piedade antes ne’e hatete katak, instituisaun ne’e hetan subvensaun públika ho orsamentu US$123,750.80, ne’ebé destina ba programa tolu.
Nia esplika katak, orsamentu refere inklui apoiu ba estudantes hamutuk US$ 22,000, apoiu ba dosentes US$56,000, no atividade sira seluk ho orsamentu hamutuk US$ 45,750.80.
Salustiano hatete katak, osan subvensaun ne’e foin tama, nune’e ezekusaun seidauk to’o 20%, maski atividade sira hotu planeadu ona no sei kontinua iha fulan sira tuir mai.
(jac)
