DILI, STLTIMORLESTE.com – Ministeriu Edukasaun (ME) liuhusi Servisu Edukasaun Munisipiu (SEM) Bobonaro, hahu fahe ona lista professores vizilansia ba kartaun estudantes finalista sira ne’ebé sei tuir Ezame Nasional no Ezame Lokal ba diretores eskola sira.
Diretor Servisu Edukasaun Munisipiu Bobonaro, Miguel Freitas hato’o informasaun ne’e ba STL liuhusi via-telefone, Tersa-feira (06/10/2026).
Nia hatete katak, eskola sira iha Munisípiu Bobonaro prepara ona hodi simu prosesu ezame nasional no ezame lokal, ne’ebé sei hala’o iha loron 19 fulan ida-ne’e.
“Ohin ami bolu sira mai halo enkontru hodi fahe lista professores vizilansia ba Ezame Nasional no Ezame Lokal ba eskola sira, nune’e mos ami fahe númeru ezame ba estudantes finalista sira,” nia hatete.
Miguel Freitas mós apela ba estudantes no professores sira atu kuidadu saúde no seguransa, tanba tempu ba ezame besik ona. Nia husu ba sira ne’ebé uza transporte atu kuidadu an durante viajen.
Nia mós enkoraja estudantes finalista sira atu uza tempu ho diak hodi prepara an ba ezame, atu bele hetan rezultadu ne’ebé diak.
“Hau husu ba ita nia estudantes sira atu uza tempu barak hodi halo preparasaun ba ezame. Ezame nasional ida-idak tenke prepara an atu bele hetan rezultadu ne’ebé diak,” nia haktuir.
Iha fatin seluk, Direitora Servisu Edukasaun Munisipiu Aileu, Beatriz de Deus, hatete katak estudantes finalista sira iha munisípiu ne’e prepara an ona atu tuir Ezame Nasional no Ezame Lokal.
“Ami nia estudantes husi eskola sira iha Munisípiu Aileu prepara an atu tuir Ezame Nasional no Ezame Lokal,” nia informa.
Enkuantu, Diretor Servisu Edukasaun Munisipiu Lautem, Anibal Fernandes, hatete katak eskola sira halo preparasaun ba ezame, no estudantes presiza estuda didi’ak atu bele hetan rezultadu ne’ebé diak, tanba rezultadu depende mós ba esforsu estudantes ida-idak nian.
(jac)
