OECUSSE, STLTIMORLESTE.com — Uniaun Profisionál Jornalista Timor-Leste (UPJTL) sosializa importánsia profisaun jornalista ba estudante EBC Pasabe liu husi programa media tour, Tersa-feira (06/10/2026).
Prezidente UPJTL, Horácio Babo hateten, atividade ne’e objetivu atu hakbesik jornalista sira ho komunidade no estudante sira iha área rural.
“Ami mai atu hakbesik ba komunidade no estudante sira, hodi fahe informasaun kona-ba situasaun iha área rural.”
Horácio hateten, jornalista nia knaar mak rekolla, verifika no edita informasaun, inklui foto no vídeo, molok publika ba públiku.
“Jornalista nia servisu mak ba komunidade no ema hotu, tanba fasil atu asesu ba fatin ne’ebé deit.”
Nia hateten, iha era dijital, públiku asesu informasaun liu husi telemovel no plataforma dijital, hanesan Facebook, WhatsApp no Instagram.
Horácio argumenta, media bele sai fonte rendimentu, se utiliza ho responsabilidade liu husi atividade produtiva ne’ebé publika ba públiku.
Nunee mos Diretór EBC Pasabe, Domingos Mauno agradese UPJTL tanba fahe informasaun kona-ba importánsia jornalista ba estudante sira.
“Matéria ne’ebé ohin ita boot sira fahe diak tebes, tanba estudante bele aprende utiliza media ho diak.”
Domingos informasaun, estudante sira presiza kompriende vantajen no dezvantajen media, atu utiliza plataforma dijital ho responsabilidade.
Estudante Veronica Cunha mós agradese UPJTL tanba fahe informasaun kona-ba importánsia jornalista no utilizasaun media ho efisiénsia.
“Ami kontente bainhira media mai ami nia fatin sosializa kona-ba importánsia jornalista no oinsá utiliza media ho efisiénsia.”
(jen)
