DILI, STLTIMORLESTE.com — Redusaun númeru eskoltu ba membru Governu, bele ajuda Polísia Nasional Timor-Leste (PNTL) aloka rekursu umanu ba seguransa públika.
Rekomendasaun Parlamentu Nasionál (PN) atu redús efetivu eskoltu ba membru Governu, konsidera importante hodi hadi’a distribuisaun efetivu PNTL.
Medida ne’e bele fó oportunidade ba PNTL atu aumenta prezensa polísia iha suku no postu administrativu, liuliu iha área ne’ebé falta efetivu.
Alénde ne’e, redusaun eskoltu bele kontribui ba efisiénsia servisu no permite PNTL, konsentra rekursu ba protesaun komunidade no manutensaun ordem públika.
Akademista Universidade Nasionál Timor-Lorosa’e (UNTL), Eduardo da Costa, apoiu rekomendasaun ne’e no konsidera presiza re-avaliasaun ba sistema eskoltu VIP.
“Membru Governu presiza seguransa, maibé númeru eskoltu labele afeita servisu PNTL ba komunidade,” dehan Eduardo ba STL, iha Kaikoli, Dili, Tersa (06/10/2026).
Nia dehan, PNTL presiza kria kritériu klaru atu determina sé mak presiza eskoltu ekstra no sé mak la presiza, bazeia ba análize risku seguransa.
Tuir Eduardo, kritériu ne’e tenke bazeia ba avaliasaun risku ne’ebé lójiku, atu desizaun kona-ba eskoltu la’ós de’it tuir estatutu ka pozisaun membru Governu.
Iha parte seluk, Observador Polítika, Daniel de Oliveira, konsidera reforma sistema eskoltu presiza haree liu husi perspetiva transparénsia, efisiénsia no interese públiku.
Nia dehan, redusaun eskoltu la’ós signifika hamenus seguransa ba autoridade, maibé presiza garante katak rekursu PNTL uza ho prioridade no tuir nesesidade seguransa.
Daniel mos sublinha katak, PNTL presiza iha regra no prosedimentu klaru kona-ba atribuisaun eskoltu, atu evita persepsaun diskriminasaun no uza rekursu públiku la ho efisiénsia.
(car)
