DÍLI, STLTIMORLESTE.com – Joven sira hasoru dezafiu oin-oin iha moris loron-loron, liu liu influénsia rede sosial, no presiza tau Maromak sai prioridade iha moris.
Liafuan ne’e hato’o husi Madre Silvina Araujo Soares Tomas ba STL, iha Katedral Dili, Segunda Feira (5/10/2026).
Tau Maromak Sai Primeiru
Madre Silvina hatete, katak rede sosial sai ida husi dezafiu boot ne’ebé dada atensaun joven sira, tanba telefone no kontentu iha rede sosial dala barak halo joven sira fó tempu barak liu ba mundu dijitál.
“Hau hadomi telefone duke hau hadomi biblia, dezafiu joven barak fó tempu ba telefone duke Biblia,” Madre Silvina hatete.
Nia hatete, dezafiu seluk mak relasaun livre entre joven sira, ne’ebé bele mos akontese tanba falta informasaun no falta kapasidade atu halo discernimentu espirituál.
Tuir nia, atividade hanesan halimar bola, pasiar no divertimentu seluk mós bele sai dezafiu bainhira joven sira la konsege halo balansu entre buat mundu nian no buat espirituál.
Madre Silvina apela ba joven sira atu hili buat ne’ebé di’ak no orienta moris ba buat sira ne’ebé lori besik ba Maromak, tanba ema hotu iha Maromak nia oin iha dignidade no valor úniku.
Nia hatete, feto ka mane, ferik ka katuas, liuliu joven sira, hotu-hotu presiza haree sira-nia moris iha Kristu no la bele husik dezafiu mundu nian kontrola sira-nia moris.
“Oinsa atu sai husi dezafiu sira ne’e? Tau Maromak sai primeiru iha ita nia moris. Bainhira ita hasoru dezafiu, ita tenke bolu no kontra; labele hela deit,” nia hatete.
Nia mós fó konsellu ba joven sira atu uza tempu ho di’ak, inklui bainhira ba pasiar ka ba tasi, tenke nafatin iha tempu atu hanoin kona-ba Maromak, partisipa iha misa, no iha uma fó tempu lee Biblia no rona Maromak nia liafuan.
Madre Silvina subliña katak joven sira la presiza hasoru dezafiu sira mesak, maibé tenke lao hamutuk ho Maromak liu husi moris orasaun.
Tuir nia, liu husi orasaun no leitura Biblia, ema bele hametin relasaun ho Maromak no hetan forsa atu hasoru dezafiu sira iha moris loroloron.
“Lao hamutuk ho Nai Maromak iha vida orasaun, besik ba Nai. Liu husi orasaun mak lee Maromak nia liafuan,” nia afirma.
(joa)
