FATUMEA, STLTIMORLESTE.com — Odamatan no janela balu iha Eskola Ensinu Baziku Sentral (EBC) Traducama, Postu Administrativu Fatumea, Munisípiu Covalima, hetan kondisaun aat no presiza manutensaun, ne’ebé bele afeta kondisaun sala aprendizajem ba estudante sira.
Kondisaun infraestrutura eskola ne’e hetan observasaun husi STL, bainhira partisipa iha programa média Tour ne’ebé organiza husi Asosiasaun Timor-Leste Union Press (TLPU) iha eskola refere, Tersa (06/10/2026).
EBF Traducama iha sala aprendizajem tolu ne’ebé utiliza ba estudante husi Setimu to’o Nonu Anu, ho total estudante 67 no profesór na’in lima.
Maibé, iha sala balu, janela sira kuaze laiha vidru, enquanto odamatan balu iha kuak no kondisaun aat, ne’ebé presiza atensaun husi parte relevante atu garante ambiente aprendizagem ne’ebé seguru no konfortável.
Diretor EBF Traducama, Gilberto dos Reis, hateten katak eskola hetan konsesaun eskolar, maibé montante osan ne’e depende ba númeru estudante no presiza fahe ba nesesidade oioin iha eskola.
“Sim, eskola ne’e iha konsesaun, maibé konsesaun eskola ne’e bazeia ba númeru alunu, 67 nee vezes ba 2 total tinan ida,” hateten Gilberto dos Reis iha EBF Traducama, Tersa (06/10/2026).
Nia esplika katak orsamentu husi konsesaun eskolar ne’ebé eskola simu kada tinan husi Ministériu Edukasaun la sufisiente atu responde ba nesesidade manutensaun infraestrutura, inklui janela no odamatan ne’ebé aat.
Tuir nia, orsamentu ne’ebé disponivel la’ós de’it atu uza ba manutensaun ki’ik, maibé tenke responde mós ba nesesidade eskritóriu no saneamentu eskola.
“Vidru rahun ne’e ami sei halo hela planu tanba bazeia ba ami nia orsamentu, tanba foin lalais mak ami halo manutensaun ki’ik ba hariis fatin no dada bee moos mai eskola,” dehan nia.
Nia hateten katak iha tinan 2026, eskola mós tenke uza parte husi orsamentu konsesaun eskolar atu halo kanalizasaun bee moos mai eskola, ho distánsia liu metru 100.
“Hanesan ne’e mak ami foin uza bee; se lae, ami iha ne’e bee araska. Entaun agora bee ne’ebé ami liga mai ne’e mak uza ba fase liman, tein iha merenda eskolar no hemu,” esplika Gilberto.
Merenda Eskolar Lao Normal, Maibé Ai-Fuan Menus
Aleinde infraestrutura, diretor eskola informa katak implementasaun Programa Merenda Eskolar (PME) iha EBF Traducama lao normal tuir menu ne’ebé determina.
Maibé, estudante sira menus hetan ai-fuan iha menu merenda eskolar tanba, tuir nia, iha difikuldade atu hetan forneseimentu ai-fuan iha Munisípiu Covalima atu garante menu refere.
Nia husu atu nesesidade eskola, liuliu manutensaun infraestrutura no forneseimentu merenda eskolar, bele hetan atensaun husi entidade relevante atu garante estudante sira hetan ambiente aprendizajem no nutrisaun ne’ebé di’ak.
(tom)
