DÍLI, STLTIMORLESTE.com – Turizmu internasionál gera US$ 62.5 miliaun iha 2025, ho 95% vizitante hakarak rekomenda Timor-Leste.
Liu husi press release neebe STL simu husi media Ministeriu Turismu no Ambiente, Tersa nee (06/10/2026) hatete,
Peskiza International Visitor Survey (IVS) 2025 hatudu katak 91% vizitante iha intensaun atu fila fali ba Timor-Leste.
Peskiza ne’e publika husi Organizasaun Turizmu Pasífiku (SPTO) no Ministériu Turizmu no Ambiente (MTA), liuhusi Pacific Tourism Data Initiative (PTDI).
Inisiativa PTDI ne’e hetan finansiamentu husi Governu Nova Zelándia atu hametin kapasidade dadus turizmu ba planeamentu no investimentu.
Peskiza hatudu katak 84% vizitante konsidera Timor-Leste destinasaun úniku no atrativu, no 84% mós konsidera folin gastu iha nasaun ne’e di’ak.
Enkuantu 58% respondente mak vizitante ne’ebé mai Timor-Leste dala uluk, hatudu interese foun ba destinasaun turizmu nasaun nian.
Ema no hospitalidade sai atrasaun prinsipál ba vizitante, ho 46%, tuir beleza naturál no paisajen, ho 30%.
Kultura, istória, mergullu no snorkelling mós sai atrasaun importante ba vizitante internasionál sira durante sira nia vizita.
Gastu direta média kada vizitante ba viajen ida mak US$1,279, inklui gastu prepagamentu no osan ne’ebé sira gasta iha Timor-Leste.
Montante ne’e ekivale ho besik US$165 kada vizitante kada loron. Iha 2025, estimasaun vizitante internasionál atinji ema 48,927.
Bazeia ba númeru vizitante hirak ne’e, kontribuisaun direta turizmu ba ekonomia Timor-Leste atinji estimasaun US$62.5 miliaun.
Férias sai objetivu prinsipál vizita, ho 55%, tuir negósiu no konferénsia 13%, vizita família no belun 10%, no voluntariadu 10%.
Peskiza no edukasaun reprezenta 7% husi objetivu vizita. Ázia sai rejiaun orijen vizitante barak liu, ho 52%, tuir Europa 22% no Oseánia 19%.
Merkadu prinsipál mak Austrália ho 18%, Xina 17%, Indonézia 16%, Portugal 13% no Malázia 4%.
Vizitante sira identifika transporte, estrada no prosesu aeroportu nu’udar prioridade atu hadi’a esperiénsia no kompetitividade destinasaun turizmu.
Informasaun no sinalizasaun, konektividade dijitál, limpeza ambientál no jestaun lixu mós presiza hadi’a, tuir rezultadu peskiza ne’e.
Diretór-Jerál Turizmu MTA, Antonio da Silva, dehan rezultadu IVS sei orienta prioridade planeamentu no investimentu turizmu nasionál.
“Vizitante sira valoriza kmanek no hospitalidade povu, ambiente naturál, kultura, tradisaun no istória Timor-Leste nian,” Antonio da Silva dehan.
Nia hatutan katak, rezultadu peskiza sei ajuda MTA prepara prioridade investimentu, liuliu atu Timor-Leste sai anfitriaun Cimeira ASEAN iha 2029.
“Ministériu Turizmu prevee turizmu sei aumenta 10% to’o 20% no iha meta simu vizitante 100,000 ho gastu US$200 miliaun to’o 2030,” nia dehan.
Peskiza IVS 2025 sai marcu importante iha parseria SPTO ho MTA liuhusi PTDI, atu hametin dadus ba planeamentu turizmu bazeia ba evidénsia.
(dom)
