OECUSSE, STLTIMORLESTE.com — Ensinu Báziku Central (EBC) Pasabe enfrenta falta bee moos no moru protesaun, ne’ebé afeta seguransa no aprendizajen estudante sira.
Diretór EBC Pasabe, Domingos Mauno hatete, eskola durante ne’e uza bee posu tanba seidauk iha sistema bee moos permanente.
“Durante ne’e, ami uza bee matan iha mota laran, maibé bainhira bailoron boot mai, bee maran ona,” hatete Domingos Mauno ba jornalista sira iha EBC Pasabe, Kuarta-feira (07/10/2026).
Nia esplika, Administrasaun Postu Pasabe no Servisu Água no Saneamentu (SAS) informa ona planu atu lori bee ba eskola.
Maibé, to’o agora, torneira ne’ebé sei fornese bee ba eskola seidauk instala, nune’e problema bee kontinua.
Domingos mós preokupa tanba EBC Pasabe seidauk iha moru protesaun atu asegura seguransa estudante sira durante atividade eskolar.
“Bainhira moru protesaun la iha, estudante sira balun seidauk to’o tempu fila ona ba uma tanba odamatan barak,” nia esplika.
Nia argumenta, alojamentu ba profesor sira seidauk iha, maski profesor balun mai husi munisípiu seluk atu servisu iha Pasabe.
“Fatin ba profesor sira seidauk iha, nune’e problema ida-ne’e presiza atensaun tanba balun mai husi munisípiu seluk,” nia koalia.
Eskola mós seidauk iha eskritóriu ba profeor sira, nune’e profesor sira uza biblioteka hodi hala’o atividade administrativa.
Domingos husu Ministériu Edukasaun atu tau atensaun ba problema infraestrutura sira iha EBC Pasabe ne’ebé hato’o ona.
Nia dehan, problema sira ne’e presiza resposta konkretu atu garante ambiente di’ak ba estudante no professor sira.
Nunee mos Profesor EBC Pasabe, Veronica da Cunha informa, eskola enfrenta falta bee moos no moru protesaun.
“Ami nia eskola presiza tebes bee moos atu uza ba ijiene, maibé bee moos falta no eskola mós la iha moru,” nia afirma.
EBC Pasabe agora iha estudante hamutuk 375, ne’ebé presiza ambiente eskola seguru no fasilidade básika ne’ebé adekuadu.
(jen)
