DILI, STLTIMORLESTE.com – Orasaun ho fiar no laran-metin bele lori ema hakbesik ba Maromak, ne’ebé hatán ho grasa no mizerikórdia.
Mensajen ne’e hato’o husi Padre Paul Kerans SVD ba STL, Kuarta-feira, 7 Outubru 2026, liuhusi refleksaun Evanjellu Lucas 11:1-4.
Padre Paul hatete, ema presiza halo orasaun ho ksolok no laran-metin, tanba orasaun mak dalan atu hakbesik an ba Maromak.
“Ita halo orasaun ho ksolok no laran-metin ka lae? Ema Judeu sira koñesidu tanba sira nia devosaun ba orasaun.” katak Padre Paul.
Tuir Padre Paul, ema Judeu sira iha tradisaun forte kona-ba orasaun, ho orasaun formál ne’ebé halo dala tolu kada loron.
Rabi sira mós iha orasaun ba okaziaun oioin, no sira hanorin dixípulu sira orasaun simples atu bele uza beibeik iha moris loron-loron.
Iha Evanjellu Lucas, dixípulu sira husu Jesus atu hanorin sira halo orasaun, depois sira rona Jesus hanorin kona-ba Orasaun Aman Nian.
Orasaun Aman Nian ajuda ema atu komprende relasaun ho Maromak nu’udar Aman, no hakbesik an ba Nia ho fiar, laran-metin no esperansa.
“Ita bele hakbesik an ba ita Aman Maromak ho laran-metin no brani tanba Jesus Cristo loke ona dalan ba lalehan mai ita.” katak Padre.
Padre Paul esplika katak, liuhusi Jesus Kristu, ema hetan dalan atu hakbesik an ba Maromak no simu nia domin, grasa no mizerikórdia.
Bainhira ema husu tulun ba Maromak, resposta bele mai liuhusi dalan oioin, tuir Nia vontade no tempu ne’ebé Nia hatene di’ak liu. “Bainhira ita husu tulun ba Maromak, Nia hatán ho grasa no mizerikórdia.” katak nia.
Padre Paul hatete, Maromak iha laran-di’ak no gosta atu perdua ema, maibé Nia mós hein ema atu perdua no trata maluk sira ho laran-di’ak.
Orasaun ne’ebé loos la’ós de’it husu buat materiál, maibé mós husu matenek, forsa no vontade atu moris tuir Maromak nia vontade.
Padre Paul subliña katak, domin no grasa Maromak nian bele muda ema nia moris, hodi ajuda ema atu hadomi no serbí malu hanesan Jesus hanorin.
“Ita bele halo orasaun ho fiar ne’ebé nakonu ho esperansa tanba ita-nia Aman iha lalehan hadomi ita.” Katak Padre.
Evanjellu Lucas 11:1-4 hatudu momentu ida bainhira Jesus nia dixípulu sira husu atu hanorin sira kona-ba orasaun.
Pergunta dixípulu sira nian mosu tanba sira haree Jesus dala barak hasoru Maromak iha orasaun, no sira hakarak aprende atu halo hanesan Mestre.
Jesus responde liuhusi hanorin Orasaun Aman Nian, ne’ebé sai baze importante ba vida orasaun kristaun no relasaun entre ema ho Maromak.
Orasaun ne’e la’ós de’it konvida ema atu husu buat ne’ebé presiza, maibé mós atu hahi Maromak, buka Nia vontade no husu perdáu ba sala.
Iha vida loron-loron, ema bele hasoru problema, sofrimentu, preocupasaun no dezafiu oioin, maibé orasaun bele sai fonte forsa no esperansa. Tanba ne’e, Padre Paul konvida ema atu kontinua halo orasaun ho fiar, laran-metin no esperansa, tanba Maromak sempre rona Nia oan sira.
“Aman iha lalehan, haraik mai ha’u hanoin atu koñese Ita, vontade atu serbí Ita, no fuan atu hadomi Ita.” Katak Padre.
Orasaun ne’e mós husu Maromak atu fó grasa no forsa, hodi ema bele simu Nia vontade santu no halo nia intensaun hotu-hotu kontente Maromak.
“Iha tempu hanesan, ema husu tulun atu bele halo di’ak no perdua ema seluk, hanesan Maromak halo di’ak no perdua ita.” Hakotu.
(eme)
