DILI, STLTIMORLESTE.com – Servisu Edukasaun Munisipál Bobonaro submete ona lista profesores ne’ebé sofre moras prolongada ba Ministériu Edukasaun (ME), atu ministeriu bele halo verifikasaun ba sira-nia kondisaun.
Diretor Servisu Edukasaun Munisipál Bobonaro, Miguel Freitas, hato’o informasaun ne’e ba STL liu husi telefone, Kuarta-feira (07/10/2026).
“Nia lista professor sira ne’ebé ho kondisaun moras ami haruka ona ba ME. Liu-liu professores ne’ebé ho kondisaun moras, ami haruka lista ne’e desde fulan Julhu no Agostu ba Ministériu Edukasaun, atu haree,” dehan Miguel Freitas.
Nia hatete katak, lista professor sira ne’ebé husu atu reforma mos submete ona ba ME. Maibé, nia la bele hatete ho loloos númeru professor sira ne’ebé tama iha lista, tanba nia iha viajem hela.
Direitor Nasionál Rekursu Umanu iha ME, João Amaral hatete katak, ME ho ekipa konjunta sei halo verifikasaun ba professores moras prolongada hamutuk ho númeru liu 200.
“Moras prolongada barak mak identifika ona. Iha Munisípiu Díli mos barak mak ami identifika ona. Segundu provizoriamente, liu 200 mak ita atu verifika tan, inklui Díli no munisípiu sira seluk,” katak João Amaral.
Nia hatete, númeru liu 200 ne’e inklui professores husi munisípiu hotu, no ekipa konjunta sei kontinua halo verifikasaun iha terenu.
“Objetivu husi ami-nia ekipa konjunta tun ba terenu mak atu haree professor nia kondisaun. Karik haree katak ho tratamentu fulan ida ka rua bele rekopera no fila fali mai servisu, maibé karik durasaun moras ne’e naruk, ita bele fó pensaun invalidez hodi kontinua halo tratamentu,” tenik nia.
Nia hatete tan katak, depois professor rekopera husi moras no seidauk atinji idade 65, nia bele halo pedidu atu fila fali hanorin estudantes iha sala de aula.
Ekipa konjunta ne’ebé halo verifikasaun ba professores moras prolongada kompostu husi reprezentante husi Comissão da Função Pública (KFP), Ministériu Saúde (MS), Ministériu Solidariedade Sosiál (MSS) no Ministériu Edukasaun (ME).
“Ita tun ba haree no observa mos husi saúde, ne’ebé Servisu Seguransa Sosiál servisu hamutuk ho sira, atu ita bele kontinua halo verifikasaun ba ita-nia professores ne’ebé ho kondisaun moras,” dehan João Amaral.
Iha parte seluk, Diretor Servisu Edukasaun Munisipál Liquiçá, Júlio da Silva hatete katak, iha professores balun iha Liquiçá ne’ebé sofre moras no la ativu hanorin estudantes tanba sira sei hala’o tratamentu.
“Ita-nia profesores balun iha Liquiçá ho kondisaun moras no la ativu hanorin ita-nia estudantes, tanba balun sei halo tratamentu,” nia esplika.
(jac)
