DILI, STLTIMORLESTE.com — Xefe Estadu-Maior Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raúl “Falur Rate Laek” despede delegasaun jogadór 38 atu partisipa iha Army Football Championships iha Brisbane, Austrália.
Tenente Jenerál Falur Rate Laek halo serimónia despedida ba delegasaun feto no mane iha Kuartel Jenerál F-FDTL, Fatuhada, Kuarta-feira (07/10).
Delegasaun ne’e sei partisipa iha jogu amizade entre F-FDTL no Australian Defence Force (ADF), liuhusi eventu 2026 Army Football Championships.
Falur husu jogadór sira atu lori naran no imajen F-FDTL no Timor-Leste ho responsabilidade durante sira nia estadia iha Austrália.
“Ita bá joga ho Austrália. Ida ne’e konsolida ita nia prezensa no tau ita nia naran iha mundu tomak,” Falur dehan.
Nia hatete partisipasaun iha eventu desportivu ne’e mós parte hosi kooperasaun téknika militár entre Timor-Leste no nasaun parseiru sira.
Tuir Falur, F-FDTL durante tinan ida ne’e partisipa ona iha atividade desportiva hamutuk dala ha’at nu’udar parte hosi kooperasaun ho parseiru.
Nia fó boa-viajen ba delegasaun no husu jogadór sira atu hala’o kompetisaun ho responsabilidade, disiplin no espírito luta.
Falur subliña katak, vitória no derrota parte hosi kompetisaun, tanba jogadór sira tenke simu rezultadu ho espírito desportivu no respeitu ba malu.
“Hau hakarak imi bá joga la’ós kona-ba manan ka lakon de’it, maibé atu kria amizade no haluan kooperasaun ho parseiru sira,” nia hatete.
Nia mós hato’o agradeseimentu ba Defence Cooperation Program (DCP) tanba apoiu no fasilitasaun ba partisipasaun F-FDTL iha atividade ne’e.
“Hau hato’o obrigadu barak ba Defence Cooperation Program nia apoiu, tanba sira fasilita ita atu partisipa iha atividade ida ne’e,” Falur dehan.
Delegasaun sei hetan akompañamentu hosi Xefe Ekipa, Tenente Koronel Helio Filipi Dias Quintas, no Ofisiál Desportivu, Kapitaun Marques.
Falur husu membru delegasaun hotu atu hare malu hanesan família, fó apoiu ba malu no mantein unidade durante sira nia atividade iha Austrália.
“Hau dezeja susesu ba imi hotu. Bá ho espírito korpu, responsabilidade no disiplin, no lori naran di’ak F-FDTL no Timor-Leste,” nia hatete.
Serimónia despedida partisipa hosi Falur Rate Laek, Adidu Defeza Austrália iha Timor-Leste, Kapitaun Fragata Matthew Richardson, no delegasaun jogadór sira.
(alb)
