DILI, STLTIMORLESTE.com — Fé sarani kontinua moris iha Gruta Golgota, Komoro, Dili, ne’ebé sai fatin reza ba ema sira ne’ebé buka dame no kbiit.
Gruta Golgota Nain Feto loke loron tomak, husi dader tuku neen to’o kalan, no simu sarani sira ne’ebé mai reza.
Iha imajen STL, feto ida ho kamizola roza haree tur hakneak iha altar oin, liman hamutuk hasoru estatua Nain Feto.
Maske lokalizadu iha sidade ne’ebé movimentadu, Gruta Golgota mantein hakmatek, haleu ho ai-hun matak no ambiente ne’ebé favorese ba orasaun.
Sarani sira la’ós mai deit iha Domingu, maibé mos Segunda to’o Sabadu, balu mai mesak no balu lori familia ho lilin ki’ik.
Maria dos Santos, ema neebe hela iha Komoro, mak ida husi sarani sira ne’ebé loron-loron mai Gruta Golgota, maski nia mai ho chinelu.
Nia dehan nia mai la’ós atu husu riku, maibé atu husu saude, kbiit no dame ba nia família iha moris loron-loron.
“Hau mai loron-loron. Se hau la mai, hau sente loron ne’e mamuk. Hau husu deit saude ba oan sira,” dehan Maria ba STL, Kuarta (07/10/2026).
Maria hatutan, nia fiar katak reza iha Gruta Golgota ajuda halo problema uma laran sai kmaan no fó dame ba nia fuan.
Iha sorin seluk, Manuel da Costa, foinsa’e ida, mai Gruta depois remata serbisu no sei uza hela nia farda servisu.
“Hau foin fila husi serbisu. Hau mai tur iha ne’e lai atu reza, depois mak fila,” dehan Manuel da Costa.
Tuir Manuel, Gruta Golgota hanesan uma inan, tanba bainhira hasoru problema no susar, nia sente seguru no hetan dame bainhira to’o iha fatin ne’e.
Entretantu Gruta Golgota Komoro la’ós deit fatuk no estatua, maibé sai sasin ba fé sarani ne’ebé kontinua moris no hametin iha komunidade.
Iha Dili ne’ebé moris lalais no barullu, Gruta ne’e sai fatin refújiu ki’ik ba ema sira atu hakmatek, reza no buka dame.
(car)
