DÍLI, STLTIMORLESTE.com – Padre Abel Soares Alves konvida sarani sira atu reza tersu loron-loron hodi hametin fiar no hasoru tentasaun.
Padre Abel hato’o apelu ne’e ba STL liu husi telefone, Kuarta-feira (7/10/2026), kona-ba signifikadu Fulan Outubru nu’udar Fulan Nossa Senhora do Rosário.
Nia hatete, devoasaun ba Nossa Senhora do Rosário iha istória naruk, komesa ho São Domingos ne’ebé hanorin ema sira atu reza tersu.
Tuir nia, São Domingos, nu’udar Nailulik Dominikanu, hanorin orasaun Pai-Nosso, Ave-Maria no Glória, ne’ebé dezenvolve sai devoasaun ba Rosário.
“Tersu sai ona tradisaun ba sarani sira atu hasoru buat aat sira,” Padre Abel hatete.
Padre esplika katak, iha tempu funu, liu-liu iha Filipina, ema sira reza tersu bainhira hasoru ameasa no situasaun difisil.
Tuir Padre Abel, esperiénsia ne’e sai parte importante husi devoasaun ba Nossa Senhora do Rosário, liu-liu bainhira ema hasoru situasaun ne’ebé difisil.
Padre Abel mós temi aparisaun Nossa Senhora iha Fátima, Portugal, iha 1917, ba pastorinho nain tolu, Lucia, Jacinta no Francisco.
Nia hatete, Nossa Senhora iha tempu ne’ebá husu atu ema sira reza tersu loron-loron, halo peniténsia no hakribiit sala.
Tuir nia, pedidu ne’e iha objetivu atu ema sira hadook an husi sala no husu Maromak nia tulun iha tempu krize.
“Tersu hamutuk ho Nain Feto hodi hasoru tentasaun oin-oin iha mundu ne’e,” nia dehan.
Padre Abel hatete, harohan liu husi Nain Feto bele sai forsa espiritual ba sarani sira atu hasoru tentasaun no buat aat.
Nia esplika, satanas la’ós buat ne’ebé ema bele haree ho matan ka kaer ho liman, maibé tentasaun bele mosu iha akontesimentu oin-oin.
Tuir nia, situasaun sira ne’e bele halo ema lakon esperansa no fiar, nune’e presiza hametin relasaun espiritual liu husi orasaun.
Padre Abel mós lembra katak Nain Feto iha relasaun besik ho Jesus Kristu, tanba nia akompaña Jesus to’o iha terus no mate iha cruz.
Iha cruz, Jesus entrega nia inan ba apostolu João, ne’ebé sai sinal katak Nain Feto mós inan espiritual ba sarani sira.
Tuir Padre Abel, tradisaun Katolika kona-ba devoasaun ba Nain Feto iha forsa liu iha Fulan Maio no Fulan Outubru.
Nia subliña katak, tersu bele sai “kilat espiritual” ba sarani sira iha luta kontra tentasaun no satanas, liu husi fiar no harohan.
Padre Abel apela ba sarani hotu atu iha tempu krize no situasaun difisil, labele hadook an husi Nain Feto no Maromak.
“Maromak hamutuk ho ita iha tempu hotu-hotu, iha tempu susar no ksolok,” nia hatete.
Nia hatete, Nain Feto akompaña Jesus Kristu iha nia knaar to’o remata, nune’e sarani sira tenke fiar katak nia sei akompaña sira.
Tanba ne’e, Padre Abel konvida sarani sira iha Fulan Outubru atu aumenta orasaun, liu-liu reza tersu partikular no hamutuk ho família.
Padre husu família sira atu kalan molok deskansa reza hamutuk no lori sira-nia moris espiritual ba parte Eukaristia nian.
Padre Abel subliña katak, reza tersu, peniténsia, hakribiit sala no partisipa iha Eukaristia tenke sai parte husi moris espiritual sarani sira.
(joa)
