OE-CUSSE, STLTIMORLESTE.com – Xefe Suku Abani, Carlos Elu, agradese media tanba fó informasaun loos no kredível kona-ba komunidade.
Carlos Elu hateten, media iha papél importante hodi hato’o informasaun kona-ba moris komunidade no dezenvolvimentu lokal.
“Ha’u agradese ba media tanba sira mai to’o iha ami nia fatin no fó sai informasaun ne’ebé loos.”
Nia koalia iha Sede Suku Abani, Pasabe, durante atividade sosializasaun Uniaun Profisionál Jornalista Timor-Leste (UPJTL), Kuarta-feira (07/10/2026).
Carlos Elu dehan, joven balun seidauk iha koñesimentu diak kona-ba utilizasaun media atu hato’o informasaun ho responsabilidade.
“Problema boot iha Timor-Leste mak ema balun seidauk profisionál atu hato’o informasaun loos no justu.”
Tanba ne’e, nia husu Governu atu fó formasaun ba joven sira kona-ba utilizasaun media iha Rejiaun Administrativa Espesiál Oe-Cusse Ambeno (RAEOA).
Nia mós rekomenda Governu atu halo polítika hodi regula fa’an SIM card iha dalan ninin no kombate propagasaun informasaun falsu.
“Ha’u rekomenda Governu halo polítika hodi minimiza fa’an SIM card iha dalan ninin no regula informasaun falsu.”
Carlos Elu koalia bainhira ekipa UPJTL realiza média tour iha Suku Abani, Pasabe, hodi aproxima jornalista ho komunidade lokal.
Nunee mos Prezidente UPJTL, Horacio Babo hateten, atividade ne’e parte husi média tour hodi komemora Loron Nasional Liberdade Imprensa.
Nia hateten, Loron Nasional Liberdade Imprensa sei komemora iha 16 Outubru 2026, ho objetivu promove importánsia liberdade imprensa.
“Ami hakarak promove dezenvolvimentu Oecusse, hanesan estrada, bee moos no situasaun komunidade iha área rurál.”
Horacio Babo hateten, UPJTL mós hakarak rekolla informasaun kona-ba atividade no realidade komunidade iha Pasabe.
“Ami koko halo kobertura atividade balun, koalia ho komunidade no estudante kona-ba importánsia media.”
Nia hateten, atividade lokal balun dala barak la hetan kobertura nasional, tanba jornalista sira presiza buka informasaun diretamente.
“Informasaun ki’ik iha suku importante atu publika, tanba atividade lokal balun dala barak la hatene iha nivel nasional.”
Horacio Babo esplika, media bele ajuda autoridade lokal sira rai no preserva arkivu kona-ba atividade no dezenvolvimentu suku.
“Publikasaun media bele sai arkivu ba tinan sira tuir mai, maski dokumentu balun lakon.”
Nia hatutan, instalasaun Starlink iha suku sira bele fasilita asesu internet no ajuda autoridade publika informasaun ba públiku.
“Starlink bele fasilita servisu no tulun suku sira atu publika informasaun kona-ba atividade komunidade.”
UPJTL kontinua halo média tour iha Oecusse atu kobertura atividade lokal no promove koñesimentu kona-ba importánsia jornalizmu.
(jen)
