OE-CUSSE, STLTIMORLESTE.com – Uniaun Profisionál Jornalista Timor-Leste (UPJTL) sosializa liberdade imprensa no responsabilidade fahe informasaun ho estudante ETV São João Paulo II Passabe.
Prezidente UPJTL, Horácio Babo hateten, liberdade imprensa importante atu valoriza mídia, jornalista no responsabilidade fahe informasaun iha sosiedade.
Nia koalia iha atividade sosializasaun iha ETV São João Paulo II Passabe, kuarta-feira (07/10/2026).
“Loron 16 Outubru importante ba liberdade imprensa, mídia no jornalista sira, no oportunidade atu valoriza papel jornalista.”
Horácio hateten, istória Timor-Leste hatudu jornalista sira iha papel importante, inklui cobertura kona-ba invasaun no esperiénsia jornalista iha Balibo.
“Balibo sai parte importante husi istória jornalizmu no liberdade imprensa iha Timor-Leste,” nia deklara.
Nia esplika, iha era modernu, jornalista no mídia presiza aumenta kapasidade, liuliu iha informasaun no teknolojia.
Tanba informasaun la’o lalais, ema hotu bele produz no fahe kontentu liuhusi mídia sosial no plataforma digital.
Horácio orienta estudante sira atu kuidadu bainhira publika informasaun iha Facebook, TikTok ka plataforma digital sira seluk.
“Ami, jornalista sira, servisu atu buka, hakerek no publika informasaun ba públiku ho responsabilidade,” nia afirma.
Nia husu estudante sira atu verifika informasaun molok fahe, atu asegura kontentu ne’ebé publika loos no bele fiar.
Horácio hateten, liberdade imprensa no liberdade fahe informasaun tenke akompaña ho responsabilidade atu evita propagasaun informasaun falsu.
Nia konsidera atividade ne’e importante atu aproxima jornalista sira ho estudante no aumenta komprensaun kona-ba papel mídia.
Iha fatin hanesan, Profesor ETV São João Paulo II Passabe, Baptista Lafo, apresia vizita jornalista sira tanba estudante hetan oportunidade aprende kona-ba mídia no jornalizmu.
“Vizita ida-ne’e importante tanba jornalista lori informasaun ne’ebé ajuda estudante sira komprende liután kona-ba mídia no jornalizmu,” nia deklara.
Baptista hateten, estudante sira hetan materiál kona-ba mídia, papel jornalista no responsabilidade iha uza informasaun.
Nia mós hateten, eskola implementa sistema ezame digital ho komputador no sala espesial ba estudante sira.
“Fasilidade teknolojia seidauk sufisiente atu responde ba nesesidade estudante hotu iha prosesu exame digital.”
Tanba ne’e, eskola presiza tan komputador no leptop atu suporta prosesu aprendizajen no ezame digital.
Baptista hateten, fasilidade balun mai husi inisiativa eskola, no balun hetan apoiu husi Sekretaria Estadu Teknolojia.
Eskola uza sistema online no aplikasaun digital, ne’ebé presiza koneksaun internet no ekipamentu teknolojia.
ETV São João Paulo II Passabe atualmente iha estudante 733, distribui ba Departamentu Informátika no Agronomia.
Estudante Romario Osorio da Cruz Nesu agradece jornalista sira ne’ebé fahe esperiénsia kona-ba jornalizmu durante atividade sosializasaun.
“Ami kontenti tebes ho prezensa jornalista sira, tanba fahe esperiénsia no hatudu ami kona-ba knar jornalista,” nia afirma.
(jen)
