DILI, STLTIMORLESTE.com — Menus ai-moruk iha Hospital Nasional Guido Valadares (HNGV) hamosu preokupasaun tanba pasiente no povu, bele sai vitima bainhira tratamentu la hetan tuir nesesidade.
Ospitál Nasionál Guido Valadares (HNGV) hato’o pedidu item 122 ba Institutu Nasionál Farmásia no Produtu Médiku (INFPM), maibé simu de’it item tolu.
Situasaun ne’e hamosu kestaun kona-ba efisiénsia sistema aprovisionamentu, jestaun stok no distribuisaun ai-moruk ba ospitál sira iha Timor-Leste.
Akademiku husi Universidade Nasionál Timor Lorosa’e (UNTL), Daniel de Carvalho, kritika diferensa entre pedidu HNGV no quantidade ai-moruk ne’ebé INFPM entrega.
“HNGV husu item 122, simu de’it tolu. Bainhira ai-moruk menus, pasiente no povu mak sai vitima tanba tratamentu bele la hetan tuir nesesidade.”dehan Daniel ba STL, iha Kaikoli, Dili, Kinta (08/10/2026).
Daniel de Carvalho hateten HNGV nu’udar ospitál referénsia nasionál ne’ebé atende pasiente barak, nune’e menus ai-moruk bele afeta diretamente prosesu tratamentu.
Nia konsidera situasaun ne’e presiza resposta urgente husi Ministériu Saúde no INFPM, liuliu kona-ba disponibilidade stok no mekanizmu distribuisaun.
Akademista nee rekomenda ba autoridade kompetente sira atu halo avaliasaun kle’an, kona-ba stok ai-moruk iha armazén sentrál no prosesu entrega ba ospitál.
Daniel mós husu atu foti medida emerjénsia hodi asegura ai-moruk nesesáriu disponivel, liuliu ba pasiente sira ne’ebé presiza tratamentu kontinua.
Iha parte seluk, observadór polítika, António Magno konsidera kestaun menus ai-moruk la’ós de’it problema tékniku, tanba nia bele iha impaktu direto ba servisu saúde públika.
Nia dehan sistema aprovisionamentu presiza transparente no responsivu, hodi evita situasaun ne’ebé ospitál sira simu ai-moruk menus kompara ho nesesidade sira.
“Saúde liga diretamente ho vida povu. Bainhira sistema la responde ba nesesidade, povu mak sente impaktu liu-liu pasiente ne’ebé presiza tratamentu.”nia dehan.
António Magno mós husu governu atu haree fali prosesu aprovisionamentu, planeamentu no distribuisaun ai-moruk hodi prevene falta ai-moruk iha ospitál.
Kestaun importante agora mak tanba sá HNGV hato’o pedidu item 122, maibé INFPM entrega de’it item tolu, no oinsá diferensa ne’e bele akontese.
To’o notísia ne’e publika, INFPM no Ministériu Saúde seidauk fó klarifikasaun kona-ba razaun entrega ai-moruk ne’ebé menus kompara ho pedidu husi HNGV.
(car)
