DILI, STLTIMORLESTE.com – Sosis no ayam potong la tama iha menu Programa Merenda Eskolar iha Pré-Eskolar Sagrada Família Vila-Verde.
Fornesedor merenda eskolar iha Pré-Escolar Sagrada Família Vila-Verde, Susan Reti hato’o informasaun ne’e ba STL, Kinta-feira (08/10/2026).
Nia hatete katak, menu merenda eskolar prepara tuir nesesidade estudantes sira, ho hahán hanesan etu, modo, naan karau, sasoro, senoura, aifuan no manu-tolun.
“Dader tuku neen ami sai husi uma mai tein ona. Ami tein etu ho modo hanesan naan karau, dala ruma tein sasoro, tau ho senoura, naan karau ho modo tahan. Aifuan hanesan masan. Sosis, ikan ho ayam potong la tama iha menu ida,” tenik nia.
Susan Reti hatete katak, merenda prepara dala ida iha dader, maibé sira tein iha kuantidade barak tanba estudantes sira tama iha turnu dader no iha mós estudantes ne’ebé tama iha meudia.
Enkuantu, Kordenador Pré-Escolar Sagrada Família Vila-Verde, Cornélio António Soares hatete katak, programa merenda eskolar iha eskola ne’e lao diak hanesan baibain.
Nia esplika katak menu muda kada loron. Segunda-feira estudantes han etu, Tersa-feira sasoro kahur ho naan no modo, Kuarta-feira etu ho manu-tolun, moilu no tomati, Kinta-feira sasoro, no Sesta-feira fore-mungu ho susu-ben no gula-mera, ne’ebé kahur ho hudi-futuk tasak.
“Merenda eskolar iha ami nia eskola nee lao diak hanesan baibain. Estudantes sira asesu ba merenda kada loron, no menu prepara tuir planu ne’ebé iha,” dehan nia.
Cornélio Soares hatete katak, ema ida mak responsavel atu tein merenda eskolar, no estudantes hamutuk 109 asesu ba programa ne’e.
Nia hatete katak, ayam potong no sosis la uza iha merenda eskolar, inklui ikan, maibé eskola uza naan karau no manu-tolun hanesan fonte proteína ba estudantes sira.
“Hametu estudantes hamutuk 109 mak asesu ba programa merenda eskolar. Ami hetan fornesedor ida. Ayam potong ho sosis ami la uza, ami uza naan karau deit. Ikan mos ami la uza. Manu-tolun ami uza tau ho moilu. Sosis la tama iha merenda eskolar,” dehan nia.
Enkuantu, Leonita Nunes, inan husi estudante, hatete katak nia oan kada loron asesu ba programa merenda eskolar no hetan hahán hanesan naan, manu-tolun, fore-mungu, susu-ben no aifuan hanesan masan.
“Ami inan sira hein deit iha liur, tanba ami lori ami nia oan mai iha eskola. Estudantes sira kada loron mai iha eskola no asesu ba merenda eskolar,” nia dehan.
(jac)
