DILI, STLTIMORLESTE.com – INFPM hatete lalos Hospital Nasional Guido Valadares (HNGV) husu aimoruk item 122, maibé simu deit item tolu (3) husi distribuisaun instituisaun.
Diretora Ezekutivu INFPM, Paulina Mendonca Maher, dehan instituisaun sempre responde ba pedidu HNGV, inklui pedidu emerjensia.
Nia esplika katak dadus kona-ba distribuisaun aimoruk ne’ebé deputadu sira simu husi staff INFPM bazeia ba sistema.
Maibé, iha situasaun emerjensia, INFPM halo distribuisaun manual atu responde ba nesesidade ospital nian no garante atendimentu pasiente.
“Dadus haree husi sistema, maibé iha distribuisaun manual tanba ospital nia servisu tenke lao hodi atende pasiente,” dehan Paulina ba jornalista ihá edifisiu INFPM Kampung Alor, Kinta (08/10/2026).
Nia hateten katak, INFPM iha Konsellu Konsultivu ne’ebé kompostu husi diretór munisípiu, xefi seksaun no tékniku sira.
Konsellu ne’e monitoriza disponibilidade aimoruk no informa ba sentral bainhira iha item ne’ebé falta iha fasilidade saúde.
Paulina dehan bainhira iha falta aimoruk, INFPM sempre buka alternativa atu rezolve problema no responde ba nesesidade fasilidade saúde.
Nia rejeita alegasaun katak durante fulan ida HNGV simu deit item rua ka tolu husi distribuisaun INFPM.
“Pedidu ne’ebé tama ami, bainhira stok iha ami rezolve, depois buka mekanismu atu garante distribuisaun kontinua,” dehan nia.
Nia hateten, distribuisaun aimoruk akontese regularmente, maibé iha situasaun emerjensia, prosesu bele halo manual.
Agora, nia dehan stok aimoruk iha armajen normal, tanba sasan ne’ebé tama distribui kedas tuir nesesidade fasilidade saúde.
Paulina informa, aimoruk vital, esensiál no nesesáriu ne’ebé iha situasaun stok-out atualmente atinji porsentu 16.
Maibé, nia subliña katak stok-out la permanente, tanba sasan ne’ebé tama sei distribui tuir nesesidade fasilidade sira.
Diretór Kompras INFPM, Sergio da Costa, dehan kuantidade item distribuídu tenke kompara tuir data no períodu pedidu.
Nia esplika katak pedidu item tolu iha loron ida diferente husi pedidu item tolu durante fulan ida.
Sergio fo ezemplu, bainhira pedidu tama ba armajen maibé item la iha, INFPM bele buka diretamente iha Arenai.
“Distribuisaun regular item tolu ba HNGV la signifika katak aimoruk hotu falta, tanba tenke haree tuir item ida-idak,” dehan Sergio.
Nia hateten, Timor-Leste depende ba importasaun aimoruk, tanba país seidauk produz aimoruk hotu iha rai laran.
“Ami la’ós produtor aimoruk, maibé depende ba liur. Bainhira sasan tama, ami foin distribui ba fasilidade saúde,” dehan nia.
Sergio hatutan, jestor sira iha responsabilidade atu kontrola stok no halo pedidu bainhira item importante komesa menus.
Nia subliña katak, bainhira item vital ida falta, jestor tenke halo pedidu atu garante disponibilidade aimoruk.
Sergio afirma, falta item ida ka rua la signifika aimoruk hotu iha INFPM la iha, tanba disponibilidade haree tuir item ida-idak.
(dom)
