DÍLI, STLTIMORLESTE.com — Jurista husu autoridade investigasaun asegura direitu detidu atu evita detensaun ilegal no violasaun prosedimentu.
Jurista Sergio Dias Quintas, iha entrevista ho STL iha Kaikoli, DÍLI, Kinta nee (08/10/2026), hatete detensaun ilegal bele akontese bainhira kaer ema laiha flagrante delitu ka liu tempu legal.
“Ministériu Públiku, nu’udar autoridade judisiária, tenke asegura direitu detidu atu labele sai vítima hosi detensaun ilegal,” dehan Sergio.
Nia hatete, detensaun ilegal la’ós kona-ba prova deit, maibé mos bainhira ajente investigasaun viola regra prosesual durante detensaun.
Sergio sublinha, órgaun polísia kriminal labele deit kaer ema no tau iha sela, maibé tenke kumpre prosedimentu hotu tuir lei.
Nia husu órgaun polísia kriminal aumenta koñesimentu kona-ba norma prosesual penal atu evita detensaun ilegal no proteje direitu fundamentál.
Aseguramentu direitu detidu importante atu garante asaun investigasaun kriminal hala’o tuir lei no respeita direitu ema nian.
Nunee mos Akadémiku Universidade Nasionál Timor Lorosa’e, Rafael de Jesus husu investigadór sira halo detensaun ho kuidadu no tuir regra.
“Bainhira investigadór sira detein ema ida, tenke haree ho kuidadu atu labele mosu detensaun ilegal,” dehan Rafael.
Rafael hatete, prosesu detensaun balu dada atensaun públiku, liuliu bainhira tribunal deside liberta detidu tanba konsiderasaun detensaun ilegal.
Nia dehan, desizaun tribunal hanesan ne’e bele hamosu dúvida iha públiku kona-ba servisu investigadór sira.
Tanba ne’e, Rafael sujere autoridade investigasaun asegura prosedimentu hotu-hotu hala’o tuir regra no norma jurídika ne’ebé vigora.
Nia sublinha, kumprimentu regra prosesual importante atu proteje direitu detidu no evita dúvida iha komunidade kona-ba autoridade investigasaun.
(ter)
