DÍLI, STLTIMORLESTE.com — Tribunal Judisial Primeira Instánsia Dili (TJPID) kontinua julga arguida inisiál AdFRS, akuzada ba krime abuzu konfiansa agravadu.
Audiénsia ne’e hala’o iha Kinta-feira, 8 Outubru 2026, Tribunal rona deklarasaun hosi lezadu ho inisiál CBS kona-ba kazu ne’e.
Tuir akuzasaun, lezadu entrega produtu sesta bázika ba armazén arguida, hodi ekipa MTCI halo verifikasaun antes konkursu.
Produtu sira ne’e inklui batar 10 toneladas, formentu 17 toneladas, kafe rahun 4 toneladas no koto 13 toneladas.
Lezadu entrega produtu sira iha 8 Juñu 2022, tuku 09:00 dadeer, hamutuk ho ema ho inisiál A.
Tuir akuzasaun, senhor A mak informa ba lezadu kona-ba armazén arguida nian no finalidade atu rai produtu sira.
Iha Fevereiru 2023, arguida husu lezadu atu selu US$ 5.000, alegadamente nu’udar osan aluga armazén.
Maibé, akuzasaun hatete katak laiha akordu kona-ba aluga armazén entre lezadu no arguida.
Lezadu ikus mai entrega US$ 5.000 ba arguida, tanba diskusaun kona-ba produtu sira ne’ebé rai iha armazén.
Depois simu osan, arguida haruka lezadu atu foti fila fali produtu sira ne’ebé sei iha armazén.
Maibé, bainhira lezadu to’o iha armazén, nia deskobre katak armazén mamuk no produtu sira hotu lakon.
Arguida informa ba lezadu katak produtu sira fa’an hotu ona ho folin US$ 5.000, tanba balu aat no balu estraga.
Lezadu konsidera katak nia hetan prejuízu, tanba valor produtu sira estimadu US$ 150.500, la’ós US$ 5.000.
Tuir akuzasaun, arguida apropria produtu sira ne’ebé la’ós nia propriedade no fa’an ba nia benefísiu rasik.
Ministériu Públiku konsidera arguida komete asaun ne’e ho livre vontade no konsiénsia, tanba hatene produtu sira la’ós pertense ba nia.
MP akuzadu arguida nu’udar autora material ba krime abuzu konfiansa agravadu, tuir Artigu 2570 n.º 1 Kódigu Penál.
Iha audiénsia, lezadu deklara katak nia partisipa konkursu sesta bázika, maibé la hetan tenderizasaun.
Tanba ne’e, senhor A ba iha lezadu nia uma no haruka lori produtu sira ba armazén arguida nian.
Lezadu deklara katak, depois de liu loron balu, arguida husu US$ 5.000 atu tula fila fali produtu sira.
Bainhira lezadu lori osan ne’e ba armazén, nia haree fatin ne’e mamuk no simu informasaun kona-ba produtu sira.
“Produtu balu estraga no balu fa’an ho folin US$ 5.000,” deklara lezadu kona-ba informasaun ne’ebé simu hosi arguida.
Lezadu hatete katak, nia sente triste no ba hato’o kedas keixa iha Polísia tanba produtu sira lakon.
Nia mós deklara katak nia koñese arguida liuhusi senhor A, ne’ebé iha tempu ne’ebá arguida nia kaben.
Lezadu hatete katak, depois problema akontese, senhor A informa katak nia la iha ona relasaun feen-la’en ho arguida.
Produtu sira ne’ebé rai iha armazén inklui kafe, batar, formentu, fore-keli no koto, tuir deklarasaun lezadu.
Antes ne’e, Tribunal rona ona deklarasaun hosi arguida kona-ba akuzasaun ne’ebé Ministériu Públiku aprezenta.
Depois rona deklarasaun lezadu, Tribunal adia audiénsia ba loron seluk atu rona deklarasaun hosi sasin sira.
Audiénsia prezide hosi painel juízes Jose Maria, Ersilia de Jesus no Ana Paula Fonseca.
Ministériu Públiku reprezenta hosi Prokurador Napoliao da Silva, enkuantu Defensor Públiku Juvinal reprezenta arguida.
(ter)
