DÍLI, STLTIMORLESTE.com — Tribunal Judisial Primeira Instánsia Dili (TJPID) kondena sidadaun Bangladesh inisiál AH ho multa US$ 270, tanba krime espekulasaun folin.
Desizaun ne’e proferida iha Kinta-feira, 8 de Outubru 2026, hosi Juíza Maria da Silva Pinto.
Tribunal hatete, hahalok arguidu prienxe elementu krime ne’ebé akuzadu ba nia, bazeia ba deklarasaun arguidu no depoimentu sasin.
Arguidu sei selu multa durante loron 90, ho taxa diária US$ 3, ne’ebé totaliza US$ 270.
Se arguidu la selu multa durante períodu ne’e, Tribunal sei aplika pena prizaun alternativa durante loron 60.
Tribunal mós informa katak, arguidu iha direitu atu halo rekursu ba Tribunal Rekursu, se la aseita desizaun.
Iha alegasaun finál, Ministériu Públiku (MP) husu pena prizaun fulan tolu, suspende ba períodu tinan ida.
MP mós husu atu Tribunal deside tuir nia konviksaun, se Tribunal iha entendimentu diferente kona-ba pena.
Enkuantu ne’e, defeza duvida ba prova sira aprezenta iha audiénsia no husu Tribunal atu absolve arguidu.
Tuir akuzasaun Ministériu Públiku, AH nu’udar na’in empreza ida iha Postu Administrativu Cristo Rei, Munisípiu Dili.
Empreza ne’e fa’an produtu nesesidade bázika, inklui mina, foos, supermie no produtu seluk.
Estadu Timor-Leste antes ne’e aviza emprezáriu no komersiante atu kumpre regra no tabela folin estabelecida.
Iha 9 Fevereiru 2023, funsionáriu AIFAESA hala’o inspesaun ba folin produtu nesesidade bázika iha área Bekora, Dili.
Durante inspesaun, ekipa AIFAESA tama loja ne’e no deskobre folin mina sa’e liu 10% hosi folin estabelecida.
MP akuzadu AH aproveita situasaun ne’e atu halo espekulasaun folin mina, ho objetivu atu hetan lukru boot.
MP konsidera hahalok ne’e asaun konsiénte no deliberadu, maski arguidu hatene katak asaun ne’e kontra lei.
Tanba ne’e, MP akuzadu AH nu’udar autor material ba krime asambarkamentu no espekulasaun folin.
Akuzasaun bazeia ba Artigu 2/2 alínea e) no Artigu 5/1 alínea a), Lei N.º 4/2011, 1 Juñu.
Iha audiénsia, AH konfirma funsionáriu AIFAESA halo inspeksaun iha nia loja, maibé nia la iha fatin bainhira inspeksaun akontese.
AH hateten, staff loja telefone ba nia no informa katak ekipa AIFAESA husu dokumentu lisensa.
Audiénsia julgamentu prezide hosi Juíza Maria da Silva Pinto, ho MP reprezenta hosi Prokurador Bartolomeo de Araújo.
Arguidu hetan asisténsia legal hosi Defensor Públiku durante prosesu julgamentu.
(ter)
