DILI, STLTIMORLESTE.com – Ema presiza dere odamatan Maromak, tanba Maromak mak belun ne’ebé akompaña no fó salvasaun ba ema.
Kestaun ne’e hato’o husi Padre Paul Kerans SVD, liuhusi refleksaun ba Evanjellu Lucas 11:5-13, ba loron Kinta, (8/10/2026).
Padre Paul esplika katak, iha kultura Médiu Oriente durante tempu Jezús, ospitalidade konsidera nu’udar obrigasaun sagrada no importante iha moris komunidade.
Nia hatete katak, situasaun ne’e ajuda ema komprende liután mensajen Jezús kona-ba relasaun entre ema ho Maromak liuhusi orasaun.
“Se ita prontu hadeer iha kalan-boot bainhira belun tuku ita-nia odamatan, ita nunka bele laran-rua atu tuku Maromak nia odamatan.” katak Padre.
Tuir Padre Paul, Jezús anima ema atu dere Maromak nia odamatan, buka Maromak no husu buat ne’ebé presiza liuhusi orasaun.
Nia mós hatete katak, ema balu bele sente baruk ka desesperadu bainhira reza kleur, tanba resposta Maromak la sempre mai tuir espetativa ema nian.
“Ita bele sente hanesan ita dere ona Maromak nia odamatan durante tinan barak, maibé orasaun sempre rona husi Maromak, la’ós sempre ho resposta hanesan ita hein.” hatete Pe Paul.
Padre Paul husu ema atu reflete kona-ba saida mak Maromak hakarak fó bainhira ema kontinua dere nia odamatan no husu iha orasaun.
Nia esplika katak, buat ne’ebé Maromak hakarak fó ba ema mak buat ne’ebé presiza liu, no nesesidade boot liu mak Espíritu Santu.
“Espíritu Santu fó kbiit mai ita atu la’o iha dalan ne’ebé Maromak hakarak, ne’ebé lori ita ba plenitude moris.” hatete Padre.
Padre Paul subliña katak, Espíritu Santu mak fó kbiit ba ema atu moris tuir Maromak nia hakarak no fahe domin ba ema seluk.
Jezús mós afirma iha Evanjellu katak, ema ne’ebé kontinua husu Espíritu Santu sei simu, tanba Maromak hakarak hatudu nia domin no misericórdia.
Iha konteúdu Evanjellu Lucas 11:5-13, Jezús uza istória kona-ba ema ida ne’ebé ba tuku nia belun nia odamatan iha kalan-boot.
Liuhusi istória ne’e, Jezús hanorin katak ema tenke perseverante iha orasaun no la bele lakon fiar bainhira resposta Maromak seidauk mosu.
Mensajen ne’e konvida ema Kristaun sira atu kontinua dere Maromak nia odamatan, ho fiar, pasiénsia no korajen, tanba Maromak rona nia oan sira.
Evanjellu Lucas 11:5-13 fó énfaze ba persisténsia iha orasaun. Jezús konvida nia disipulu sira atu husu, buka no dere odamatan Maromak ho fiar.
Mensajen ida-ne’e hatudu katak orasaun la’ós de’it kona-ba husu buat materiál ka resposta imediata, maibé mós kona-ba buka relasaun kle’an ho Maromak.
Ba Padre Paul, Espíritu Santu mak don importante liu ne’ebé Maromak hakarak fó, tanba Espíritu Santu fó kbiit ba ema atu moris iha domin no fahe domin ba ema seluk.
(eme)
