DILI, STLTIMORLESTE.com – Prezidente Repúblika (PR), José Ramos-Horta propoin atu hatun vensimentu Prezidente no membru Governu hodi aumenta saláriu mínimu ba traballadór sira.
Horta hato’o proposta ne’e ba jornalista sira iha Aeroportu Internasionál Nicolau Lobato, Comoro, Kinta-feira (08/10/2026). Nia konsidera katak presiza aumenta saláriu mínimu no hamenus despeza Estadu nian.
“Tenke haree duni saláriu mínimu atu aumenta. Bele hatun despeza seluk,” dehan Prezidente Repúblika.
Nia sujere atu hamenus despeza kombustível, viajen no sosa ekipamentu, inklui posibilidade atu hatun vensimentu Prezidente no ministru sira.
Horta afirma katak, medida sira ne’e bele ajuda hamenus orsamentu Jerál Estadu, enkuantu Governu aumenta rendimentu traballadór sira ne’ebé simu saláriu ki’ik.
Nia propoin atu aumenta saláriu mínimu ba, pelumenus US$ 200 kada fulan. Nia konsidera katak traballadór ho rendimentu ki’ik tenke hetan atensaun liu.
Prezidente mós enfatiza katak Governu tenke haree uluk nesesidade profesór sira, liuliu sira ne’ebé hanorin iha área rurál no aldeia.
Depois, nia temi profisionál saúde sira, inklui enfermeiru, parteira, médiku no traballadór laboratoriu, nu’udar kategoria importante ba prestasaun servisu públiku.
Horta hatete katak, aumentu saláriu la’ós ba funsionáriu hotu-hotu, maibé tenke konsidera produtividade no kontribuisaun traballadór ida-idak ba nasaun.
Nia mós defende atu aumenta vensimentu ba traballadór sira ne’ebé simu saláriu ki’ik, enkuantu la presiza aumenta saláriu ba sira ne’ebé simu ona rendimentu aas.
Iha parte seluk, Prezidente refere ba kritiká balun husi ema matenek sira kona-ba nia pozisaun relasiona ho aumentu impostu. Nia relata katak balun kritika nia tanba promulga lei, maski depois hatudu dezakordu kona-ba konteúdu lei ne’e.
(eme)
