DILI, STLTIMORLESTE.com – Prezidente Repúblika (PR), José Ramos-Horta konsidera delegasaun kargu Primeiru-Ministru interinu ba Ministru Justisa, Sérgio Hornai, nu’udar teste ba kapasidade lideransa no jestaun Governu.
Horta hato’o deklarasaun ne’e ba jornalista sira iha Aeroportu Internasionál Nicolau Lobato, Comoro, Kinta-feira (08/10/2026).
“Ne’e loos, ne’e hanesan teste ida ba Ministru Justisa. Se nia bele sai Primeiru-Ministru ka lae? Agora teste ne’e ba Ministru Justisa,” dehan Horta.
Xefe Estadu esplika katak, delegasaun kargu Primeiru-Ministru interinu la’ós buat foun iha Timor-Leste. Antes ne’e, Vise-Primeiru-Ministru Mariano Sabino no Kalbuadi Lay mós hetan oportunidade atu asume responsabilidade hanesan durante Primeiru-Ministru nia ausénsia.
Horta konsidera katak situasaun hanesan ne’e bele sai oportunidade atu observa kapasidade membru Governu sira iha lideransa, koordenasaun no jestaun administrasaun estadu.
Prezidente Repúblika mós afirma katak, Primeiru-Ministru iha autoridade atu delega kargu ba ema ne’ebé nia fiar atu hala’o responsabilidade durante nia la iha nasaun.
“Primeiru-Ministru bele dezigna ema ne’ebé nia hakarak,” dehan Horta.
Delegasaun kargu Primeiru-Ministru interinu permite Governu kontinua hala’o servisu ezekutivu durante Xanana Gusmão nia ausénsia. Responsabilidade ne’e inklui koordenasaun atividade Governu nian no asegura kontinuidade servisu administrativu.
Iha sistema governasaun, delegasaun responsabilidade ba membru Governu sira bele sai mekanizmu atu asegura funsionamentu instituisaun públika durante lideransa prinsipál nia ausénsia. Maibé, avaliasaun kona-ba kapasidade lideransa tenke bazeia ba rezultadu servisu, koordenasaun no kumprimentu responsabilidade sira.
Ministru Justisa, Sérgio Hornai, agora hetan oportunidade atu hala’o responsabilidade Primeiru-Ministru interinu durante períodu delegasaun, enkuantu Primeiru-Ministru Kay Rala Xanana Gusmão hala’o nia atividade ofisiál iha li’ur nasaun.
(eme)
