DILI, STLTIMORLESTE.com – Kordenador Pré-Eskolar Sagrada Familia Vila-Verde, Cornelio A. Soares hatete katak, to’o agora sira seidauk hetan dadus ka tabela klaru husi parte Rekursu Umanu iha Ministériu Edukasaun (ME), kona-ba skalaun no salariu professor sira.
Cornelio A. Soares hato’o informasaun ne’e ba STL, Sesta-feira (09/10/2026), no hatete katak informasaun kona-ba skalaun importante atu professor sira bele hatene pozisaun no salariu ne’ebé sira simu.
“Iha nee ba laiha dadus klaru konaba ami nian skalaun nee, tanba liga ba skalaun nee liga ba salarial, hanesan iha tabela salarial ninia. Dala ruma ami mos la hatene, derepente deit ami hetan hanesan nee. Kuandu ita aumenta, ita presiza hatene iha data saida, atu tarde liu ita bele hatene ita nian salariu tama ona no osan restu sei iha nee ba,” nia informa.
Nia konsidera katak, profesor sira presiza hetan dokumentu ofisiál husi parte Rekursu Umanu, ne’ebé hatudu sira-nia quadro legal, tabela salarial, no skalaun ne’ebé sira hetan.
“Konaba salarial nee, sira tenke hatene. Sira nian salariu tenke simu dokumentu ruma, fó sira nian quadro legal ba funsionáriu nian tabela, katak sira nian skalaun to’o ona iha nee. Maske sira servisu, dokumentu nee importante,” nia komenta.
Cornelio hatutan katak dokumentu ne’e importante atu sai rezistu ofisiál kona-ba salariu, skalaun, nivel no tempu servisu professor ida-idak.
Nia husu atu iha dokumentu fixa ida ne’ebé bele rai hanesan prova, atu iha futuru professor sira bele uza bainhira halo rekerimentu ka presiza konfirmasaun kona-ba sira-nia salariu no skalaun.
“Hau hakarak husu se bele halo hanesan fixa ida hodi rezistu, para aban bain rua ita nian oan bele kaer ida nee hodi ba halo rekerimentu ruma. Durante nee ami ba Rekursu Umanu dehan ita boot nian salariu hanesan nee, skalaun mos hanesan nee, maibé ita laiha dokumentu ruma print out para bele haree,” tenik nia.
(jac)
